Thursday, January 20, 2011

يا واد يا مرمر

ياواد يامرمر
يامرمرانى
اخضر خضرضر
واخضرانى
ياشمع مصرك
فى بهو قصرى
احب مصرك
تحب مصرى

نعشق فترشق
ف القلب حبة
نسقيها حبة
تطرح محبة
نسقيها تانى
ياقلبى يانى
يازهر نادى
آدى انت وادى

تشرب حبابة
تعطش صبابة
دا حب غابة
ياقلبى يابا
احلم وخضر
والصبح بدر
تشرب نداها
تسرح مداها

شجر اغانى
ياقلبى يانى
ياما انت رايق
والحب سايق
عليك دلاله
الحب ماله
حلق حرامه
على حلاله
مين فينا حاله
حلال زلاله

ومين مرافق
ومين منافق
ومين بقلبه
ومين بماله
الحب ماله
ياحبابينه
اختل شرعة
وانسب دينه
آهين يابلبل
يابو البلابل

انفض جناحك
والصبح قابل
حتلاقى بكرة
وبعد بكرة
نوارة تطرح
شجر شجرجر
ع الارض جرجر
ع البحر مكسى
وتلاقى تاكسى
وتلاقى مسرح
فى كل مطرح

وتقول يابابا
وتقول ياماما
ويحكى ان
وكان وياما
وتبقى سيرة
ونبقى ذكرى
عشان دا كله
بنحب بكره
ونعيش قبل الهنا بثوانى
مع ان بكرة
له
مصر تانى
ياقلبى يانى

No comments:

Post a Comment