شاعر تكدير الأمن العام

شاعر تكدير الأمن العام

غزة في قلب العرب

ناح الحمام في الدوح

دمع البنفسج سال

والورد مال مجروح

من شكة الموال

قال الحمام .. ياليل

ويا عيني ع اللي إنقال

مين يشتري الفيروز؟

غزه .. مع الدلاّل!

من فين يا شابة النسب

وبنت مين في الناس ؟

ومين في ناسك حسب

وعطاكي.. للنخاس!

بحرين عيونك أسى

ساقيين .. قلوب الناس

من فين يا شابه النسب

وبنت مين في الناس !؟

قالت بلهجة عرب

غزة .. في قلب العرب

حرة .. وأهلي عرب

خالص وبنت حلال

ألا-أونا بنت العرب

للبيع

ومين قال كام ؟

سنيورة شبه القمر

مصنوعة .. للأحلام

يا حلال

على المقتدر

وع الغلابة حرام

دق الجرس بالعدد

واحد

ومين قال كام ؟

البنت من بدعها

ضحكت

ومن قلبها

عشقت

ومن وجدها

سمع الوجود زلزال

لا يا عديم التنا

لاانت ولا البايعين

سوق النخاسة جبر

والأهل بالملايين

أبويا باني الحرم

وامي من القدسين

ومصر

فيها الهوى

والعزوه

في الشرقين

حلفت بالمرحمة

والدم والملحمة

والفارس اللي حمى

ما امشي ورا الأندال

ما امشي

ورا الأندال

عشق الصبايا

شوف الحكايه يا وله
شوف الحكاية
عشق الصبايا يا وله
طول معايا
منهم أسايا
وهما جرحي يا وله
وهما دوايا

زرع الوداد على غير ميعاد
بقي شغلتي
أزرع وابيع قبل الربيع
من جنتي
وأحلف وإتوب وإن شا الله أدوب
فى محبتي
والصبر طيب يا هوي
صبرك معايا

حبيت سواد العين سنه
ونسيت صباحي
وغرقت فى ليل الضنى
عشطان وصاحي
ولما بان ورد الشفايف
لون جراحي
طاوعت قلبى ورحت له
والشوق ورايا
لو القي خل يبات وفي
يصبح مراعي
لاطوي المداين ع القدم
وأمشي له ساعي
وأفرد قلوعي يا وله
واركب شراعي
أنا وحبيبى فى الهوى
على هوايا
و شوف الحكايه يا وله
شوف الحكاية

عبد المنعم رياض

زعق الوابور ع السفر
انا قلت كان بدري
نعق الغراب ع الشجر
خطف الفراق بدري
جدع
ما شفناش جدع
فات فى البلد زيه
عيط عليه القمر
والنجمه فى البدري
يا نني عين البلد
يا ابن البلد يا عزيز
بكيت عيون الولد
والبنت والعواجيز
يا قلب مصر النقي
وقلب مصر بياض
عزيز علينا اللقا
بعد الفراق يا رياض
يا عتره الحراس
يا بو الادين تنباس
ياريتنى كنت معاك
وشربت نفس الكاس
هطال يا دمع البكا
واللى بكي لم طال
دم الجدع
يا جدع
سال ع القنال
هطال
يروي على اراضينا
حدوته بالموال
بعد الصلا ع النبي
يا ليل يا عين يا نضال
ملعون يا داء البكم
ملعون يا طول البال
بعد الوطن ما اندهس
وصار ترابه حلال
للغاصب الاجنبي
والجبنا والاندال
يا حر قلب الناس
على رنه الاجراس
الشعب كله رياض
ورياض مثل
يا ناس
يا نني عين البلد
يا ابن البلد
يا شجيع
دمك عزيز ع البلد
عمر العزيز ما يضيع
كلمه وقالتها البلد
فى لحظه التوديع
بالدم
نفدي البلد
لا سلم لا تمييع
وان كان طريقك سفر
تفنيه خطاوينا
وتغوص فى جوف السحر
وعقولنا تهدينا
وان كان طريقك حجر
حتبشبشه ادينا
ونرشه من دمنا
من عندنا لسينا
يا رنه الاجراس
دقي وصحي الناس
ملعون ابوك يا خوف
بعد الشرف ما انداس

عدّى الهوى

عدى الهوي عدى
ميل هنا وهدى
شاور برمش العين
ردوا عليه قلبين
قلبين وأنا منهم
آه م الهوى ومنهم
قلب أنكوى ولا تاب
والتاني حن وداب
وبعد صبر سنين
طلع الهوى كداب
لا جاب ولا ودا
عدى الهوي
عدى

سجن القناطر 1971

حرب الشعب

ماتقولليش
ماتعدليش
حرب الشعب وغيرها مافيش
حاس يامصاروه
حاس ياولاد
حاس يامداين
حاس يابلاد
حاس ياناسنا وداسنا الغول
عض بلدنا
عرض وطول
ماتقولليش الجيش مسؤل
جيش من غير شعب
مايمشيش

التاجر و الغزال

تاجر نزل سوق
شاف غزالة
مع الدلال
قرب يدوق العسل
نهر الدموع شلال
شرب عديم التنا
من دمعنا المسفوح
زاد فى السعار والغنا
من خسة الدلال
اخص
اخص
اخص .. على كده

بهية

يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن الارض سمرا و قمرا
و ضفه و نهر و مراكب
و رفاق مسيرة عسيرة
و صورة حشد و مواكب
ف عيون صبية بهية
عليها الكلمة و المعنى



مصر يا امّة يا بهية
يام طرحة و جلابية
الزمن شاب و انتي شابة
هو رايح و انتي جاية
جاية فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية
يا بهية



الليل جزاير جزاير
يمد البحر يفنيها
و الفجر شعلة ح تعلا
و عمر الموج ما يطويها
و الشط باين مداين
عليها الشمس طوافة
ايدك في ايدنا
ساعدنا
دي مهما الموجة تتعافى
بالعزم ساعة جماعة
و بالأنصاف نخطيها



مصر يا امّة يا سفينة
مهما كان البحر عاتي
فلاحينك ملاحينك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاتب
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية

و يعود كلامنا في سلامنا يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى
تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني

اطلع من دول

اطلع من دول يابن الاباليس
اطلع من دول يابن الهرمه
تلبسوا قفاطين
تلبسوا تلاليس
انت البورمه
غير هلاهليك
يا خواجه
وهدوم دلاديلك
يا خواجه
وان شالله تخش ف تلاجه
يا خواجه الناجه كوا الناجه
حتشيل سمسارك فى شكاره
وحتطلع واكل بالصرمة

السكات

سكات سكات سكات
حواديت ورا السكات
مليان كلام لكنى
اخرس من السكات
سكات سكات سكات
مات الكلام وبات
جدار لالف دار
يبادلوني السكات
سكات
سكات
سكات
لكن لسكاتنا معنى
أنطق من الكلام
وكل من سمعنا
يفهمنا بالتمام
وحق من جمعنا
لينطق الكلام
ويقول الصمت مات
ويصرخ فى السكات
سكات
سكات
سكات

الشركسي

يا شركسي
يا أبو بندقيه
لا دين لا ذمه
لا إنسانيه
كرباج فى إيدك
والناس عبيدك
والفرده حتى
ع الجلابيه

الوف بطيري
ويلوف بغيري
يا شركسي
يا اللى كلت خيري
شافط عرقنا
كاشف ورقنا
والله سرقنا
يا مصراويه
الشركسي أبو بندقية

الصبر طيب
الصبر طيب
وأصبر وصبري دايما يخيب
سنين طويله
فاتت لا حيله
والعمر غيله
ضاع من إديه
يا شركسي أبو بندقية

الأقوال المأسورة

من سفر ما قبل الخروج

المجد للشاه
فى الاعالى
وبالناس المذله
وعلى الارض
الخراب
" شاهبور بختيار "



من سفر الخروج

حبيبك وصاحبك
وصاحب حبيبك
كلام كله فارغ
عديم المعانى
اذا الندل صاحبك
يصاحبك لعلة
وتسمع كلام
زي كذب الاغانى
وانا اللى اشتريت الخسيس
بالخسارة
وبعت الاصيل
اللى يا ما اشترانى
واول ما هبت رياح النهاية
خلعنى الخسيس
من صباعه و رماني
"الشاهنشاه رضا فهلوي"


من سفر ما بعد الخروج

اخويا الامير
بزرميط الايرانى
وعظنى ونصحنى
وسلك ودانى
لان اللى نابه
يا حبه عنيا
ما يتيخلوش أي كاتب اغانى
دا كان لسه قاعد
معايا النهارده
ولابس خواتم دهب امريكانى
صحيح الشعوب
بنت كلب ولئيمة
وممكن
تزيح العروش فى ثوانى
"واحد صاحبنا"ء

أحمد أفندي

أحمد افندى محمد حامد عبد العال
صاحب عيلة كبيرة مراته و ست عيال
عنده اسم الله حسن و حسين وسعيد و نوال
والمقروصة نفيسة و قدم الخير وصال


أحمد افندى مدرس عربى قديم ومتين
شكله تشوفه
تقول على طول من أهل الدين
شايل سبحة خشب البندق
م الغاليين
ساعه تلف يمين
وسواعى تلف شمال


غير السبحة
طالعه زبيبه ف قورته كمان
يعنى دليل
على انه بيسجد للرحمن
هيبه و تقوى
ومظهر ناطق بالايمان
ثم المشيه عليها القيمه
وفيها جلال


احمد افندى
ساكن شقه فى رابع دور
بيت الحاج عويس
ومراته الست بدور
كانوا حبايب قبل ما يتأتى المقدور
ساعة نحس اتقلب البيت
واتبدل الحال


ابن الحاج عويس
كان عامل كوره شراب
والعصريه
نازل يلعب جنب الباب
جاى بيشوط
قام طارت فرده من القبقاب
جت فى زبيبة احمد افندى
و دمها سال


ضحكت عيشه مرات السقا
و قالت يوه
ظاطوا عيال الحارة وقالوا
الجردل اهو
احمد افندى فوت عقله
بقي مش له
رقع الواد قلمين سخنين
كومه فى الحال


صرخت نوسة مرات
محمود عبدالجواد
كبدى يا خويا
يا ناس الراجل قتل الواد
نزل السيد سالم يجرى
وقال يا ولاد
اوعوا الراجل يفلت منكوا
دا موته حلال


احمدافندى زعق من تحت
وقال يا حسين
هات سكينه ونزل اخوك
ومعاك شومتين
نزلوا العيلة
واشتغل الضرب شمال ويمين
والصوت لعلع والنبابيت
غنت موال


خش محمد مرسى يخلص فى الموضوع
خد سكينه ف جنبه
وكان عيان موجوع
وقع ع الارض يئن
وعينه تشر دموع
هي ثوانى وطلعت روحه للمتعال


هاجوا العالم
والنسوان رقعت بالصوت
وامه تقول
ياحبيبى ازاى دهولك الموت
واحمد افندى لم عياله
و على برغوت
طلب النجدة من تليفون عبده البقال


وصل النجدة
لقى حوالين الجثه اتنين
اخته بتلطم
وامه بتتمرغ فى الطين
سأل الظابط
فين امال المتخانقين
قالت نوسة من شباكها
دا أبو وصال


طلعت هجمه
ان شالله ما حد يشوفها يا ناس
رزعوا الباب فشخوه اتنين
طارالترباس
خبط الحله قلبها
وساح منها القلقاس
عاص القله
ولغمص وش البت نوال


احمد افندى
وقف على حيله وقال جرى ايه
انت ازاى تتهجم كده على بيتى يا بيه
لاشه الظابط
جريوا عياله و خافوا عليه
حسن اترمى على ابوه
واتشعلق فيه وصال


امر الظابط للشرطية بالتفتيش
واللى حيعتر فى السكينة حيبقى شاويش
بعد ما لفوا اوضها وداخوا
وقالوا مفيش
لمح الظابط دم مبقع
جنب شوال


زغد المخبر
وقاله ازاى بتقول فتشت
جرى من خوفه اتكعبل
كوّع جنب الطشت
لحقه زميله وقال جرى ايه
مالك طبشت
تيّس قام مش قادر
حتى يرد سؤال


مخبر تانى
عشان موعود يترقى شاويش
فرد المطوة
و هم يمزع بيها الخيش
اول خبطه اتخض
وقال يا خبر
دا حشيش
احمد افندى وقع من طوله
فشر تمثال


كانت نزلة
ان شالله ما حد يشوفها يا هوه
احمد افندى
قفاه من حيل الضرب هاروه
وهوب شالوه
و ف قلب البوكس رموه
و ام عياله تقوله
يا سبع البيت ياغزال


ضحكت عيشه مرات السقا
وقالت يوه
ظاطوا عيال الحارة و قالوا
المجرم اهوه
احمد افندى فوت عقله
ما بقاش له
صار يلطم على وشه يقول
حبسونى عيال

آه يا خي

وآه ياخي آه ياخي
كنا نملا الدنيا ضي
بس اه
لو كنا زي
الف اه
واه يا خي
كنا جبنا الشمس
من برج الاسد
واديناها للعيال
غزل البنات
يطبعوها ع الهدوم
والكراسات
يشبكوها
ورد شعور البنات
ينظموها
عقد من شر الحسد
يضوي نوره
لما يضوي
كل حاره وكل حي
بس اه لو كنا زي
الف اه
واه ياخي
كنا المظلوم اذا هاجم
جري
كنا لو كان السلاح فى يدنا
والمعارضه
يد واحده عندنا
دسنا شاهنا
وامريكانه بنعلنا
وابتدينا الثوره
من اوسع طريق
كان تمنتاشر يناير
ف الشوارع لسه حي
بس اه
لو كنا زي
الف اه
واه ياخي

لا نحالف

لما نحالف لا نحالف إلا الأخيار
لما نحارب لا نحارب إلا الفجار
دارنا هنا حرة و إحنا فيها أحرار


يللي دمانا المهدورة سفكتها يداك
يللي بلادنا المحتلة إحتلتها قواك
لك عهد الله لا نسمعلك و لا نمشي وراك
و لا نذهب شرقي و غربي و لا يمين و يسار
دارنا هنا حرة و إحنا فيها أحرار


يا مشرد في البرية شعب فلسطين
و دبحت الشعب العربي دبح السكين
لنخاصم لاجل عيونك روسيا و الصين
ولا نقبل صدقة و رشوة بجنيه و دولار
دارنا هنا حرة و إحنا أصحاب الدار


يا مغرور يللي غرك إكرام الضيف
لو تعرف مين العربي في يوم الحيف
لا يحاور و لا يتكلم إلا بالسيف
لما نحالف لا نحالف إلا الاخيار
لما نحارب لا نحارب إلا الفجار

يا حبايبنا

يا حبايبنا
فين .. وحشتونا
لسه فاكرينا
ولا نسيتونا
دا حنا فى الغربة
م الهوى دبنا
وأنتو فى الغربة
اوعوا تفكروا
إننا تبنا
مهما فرقونا
ولا بعدونا
يا حبايبنا

سجن القناطر 1971

فلاحينك

فلاحينك هما هما
فلاحين رمسيس وخوفو
جيش
لا عيش ولا زمزمية
فى الهجيرة تبل جوفه
المرض للموت يجرة
وهو ماشي
يجر خوفه
أعمي
سالك سكه عتمه
خطوته
على قد شوفه

سجن القناطر 1970

صياد الطيور

يا صياد الطيور يا خالي

صُباعك عن زناد الموت

انا عصفور ضعيف الحال

ولا كفّيش لعيالك قوت


انا العصفور ولي في الخضره والميّه

انا المولود على كفوف الجناينيّه

بقول تغريد نغمها شديد قريب وبعيد

ياخذني الشوق على جناحه وابقى وحيد

بقول تغريد نغمها شديد على السامعين

ياخذني الشوق على جناحو وابقى وحيد

يا صياد الطيور يا خالي



لعود ثاني لا أنا حيران

ولا محزون ولا فرحان

ولا بشبع غُنى والحان

ولا بحكي مع النِسمه

ولا بشكي من القِسمه

ولمّا الدنيا تبكيني

اقول دي مصيرها مبتسمه

وأديني سنين على ده الحال

بقاسي المر والبطّال

يا صياد الطيور يا خالي



بشوف الصقر فارد في الهوى باعه

واتباعه نشرهم في الفضا جاعوا

طيور ثانيين صُغار مساكين

جواعى لكن لا هم نايمين ولا صاحيين

عشان نابه ومِخلابه تلاقي الكل احبابه

ودنيا تخاف من القوه

وجوالدنيا مش هوّ

بشوف بلبل غريب

بيرقص رقصة المذبوح

في هفّة ريح سقط عشّه وفين حيروح

وأديني سنين على ده الحال

بقاسي المر والبطّال

يا صياد الطيور يا خالي



يا صياد الطيور حافظ على الخرطوش

ده مية عصفور كمان قدّي ما يستاهلوش

حداك الصقر لو تضرب على وكره

تلاقي اللّحم متكوّم ولا بياكلوش

طاوعني ارميها من ايدك طاوع وارجع

هزيل لحمي لا حيفيدك ولا ينفع

شوفلك طير تاني

واعيش انا مرتاح البال

وأديني سنين على ده الحال

بقاسي المر والبطّال

يا صياد الطيور يا خالي

دعوة

يا خالقنا وعالم بلاوينا
يا رازقنا
وحاسب خطاوينا
نسأل فضلك
من إحسانك
يظهر عدلك
وبسلطانك
يطلع فلاح من وسطينا
يزعط أفندينا
وحرامينا

بحبك يا مصر

بحبك بحبك
بحبك بحبك
بحبك يا مصر
مسايا وصباحي
أسبح بحبك
وحبك شفايا
وجراحى يا مصر

واسافر بحبك
واميل زي ميلك
وتحلا الخطاوي
فى حبك يا مصر
واحب اغترابي
فى صبحك وليلك
واحب الونس بالرفاقه
يا مصر

تنام الدموع فى العيون الهواجع
وتسهر دموعي
فى حبك يا مصر
تهون السجون
والشجون
والمواجع
ويغلا مع القهر حبك
يا مصر

ولو يحبسونى
ولو يشنقوني
ولوا فكروا بالعذاب
يبعدونى
ح اقرب واقرب
مش ممكن اهرب
وتنزل دموعي على خدودي
تشرب
تلاقى الرموش والخدود والمباسم
مراسم
وصورتك عليهم يا مصر
بحبك بحبك
بحبك يا مصر

أنا العاشق

قد إيه برتاح أنا لحظة ما أقابل بسمتك
و بكون شديد لمّا أمد الخطوه و امشي بِسكتك

يا عشقي ياللي حُبك أداني و خد مني السنين
ما بين الحلم و الخطوه ، و بين الكلمه و الزنازين

أنا ماشي بناديلك .. أنا العاشق بغنيّلك

مشيت الليل بطول الليل .. لكن الليل ما وصّلشِ

أتاري الفجر بعيوني خيال و الجرح مادبلشِ

و شفت الناس طهارى تموت على قوتها

و ناس بتعلّي في بيوتها .. وناس راحت فِدا صوتها

وناس تايهين

وناس تحت التراب نولها

بتغزل فجر شوق نُلها

ومهما الغدر بِنُلها

اكيد واصلين .. اكيد واصلين

وانا يومي اللي جاي لسه ما خضَرّش ِ

و بكره بذره حتنبت مع الطالعين

صلاة الزين .. صلاة الزين .. صلاة الزين على أولادك شُداد جامدين

صلاة الزين .. صلاة الزين

يا ست الكل يا خضره .. يا شابه ياللي كحل العين

أنا بناديلك .. و أ نا اللي بغنيلك .. أنا العاشق بقرآنك أناديلك

و قوليلي انت فين و أنا اجيلك .. أوفّي الدين .. و اناديلك

ونزرع شمسنا ضحكه على شفة وليد أخضر

تندّي الأرض و تفتح زهور اكثر

الليل عجوز

الليل عجوز .. أطرش .. ضرير
يُلّسّوعه صوت النفير
و يموت بضربة شمس
عّيان و في النزع الأخير
وبرضه بيهلّوس كتير
و يعيد كلام الأمس

يا ليل ياعين كل الجراح
يا نسر غاير في السما
الأمس فين .. الأمس راح
الأمس كان .. لكنما
نزلت كرابيج الصباح
زي القدر
شقت على جبين البطاح
طريق عداله للبشر

تكرم عين الشعب

تكرم عين الشعب الزين
في عمان وفي القطرين
شعب عنيد يقول ما يريد
وشو ما يقول عَ الرأس والعين

ويا مروّح زَعِق بالجاي
تكرم عينك يا أبضاي

تكرم عين شبيبة ملاح
يفدوا الثورة بالأرواح
شالوا بجنح الليل سلاح
وشالوا الرقبة عَ الكفين
ونحن زلامكم يا ثوار
ولو بتريدوا نعدي بحار
ولا رجعية ولا استعمار
بتفرق بين الأخين

ويا مروح زَعِق بالجاي
تكرم عينك يا أبضاي

تكرم عين الشعب الزين
تكرم عين الفدائية
مصابيح الأمة العربية
عَ طريق الوحدة الحتمية
من حد المغرب للشرقين
وشو شبك ياللي تريد لبنان
غريب الأهل عن الأوطان
عَ طرابلس حَوّد من شان
تشوف لبنان رايح عَ وين

ويا مروح زعق بالجاي
تكرم عينك يا أبضاي

تكرم عين الشعب الزين
يا فلسطين يا جرح الناس
ويا مسبب أوجاع الرأس
وتضل تسَهّر حراس
هموم القلب ودمع العين
ولا يملك غير جرح جديد
ونز رصاص ودم شهيد
وسيف بثأر ونار وحديد
تعيد الحق ترد الدين

والرايح يزعق بالجاي
تكرم عينك يا ابضاي

يا ريما

وحدك
وانا وحدي
أبكي ساعات
وحدي
طول السفر والليل
يا غربتي وحدي
يتقل علي الويل
أغزل أقول وحدي
صحرا وانا جمال
وحدي
شيله وانا شيال
وحدي
قصه وانا موال
وحدي
غربه وانا
وحدي


يا ريما
يا ريما
يا زهرة الصبار
يا خدودك الأنهار
عشرين ربيع عمرك
بين الحنين والنار
بتلوني الأحلام
وبتطرحى النوار
وانا خريفي دوم
بين العطش والصوم
لا لي جلد ع النوم
ولا السهر
وحدي

زي النهاردة

زى النهارده من زمان
من كام سنه
مفيش لزوم للعد او للحسبنه
اصل الحكايه
عد عمرك يا جحا
قال: يوم فلس
وخمسه سته عكننه
فلس فلس
يحيا الفلس والجدعنه


زى النهارده
الست هانم والدتى
حزقت وقالت بالقليل
يا دهوتى
واتجمعوا نسوان حارتنا
يسمعوا صرخه قدومى
ويستباركوا بطلعتى
قله عقول طبعا
وحركات نسونه


لا والمصيبه ان الجماعه
ماشورونيش
ولا حد قالى ان كنت اجى
او مجيش
قال ليه وليه
ابويا ناغش والدتى
قام شىء حصل بعد المناغشه
ميتحكيش
وابن العرب فى الشىء ده
فن.. وحرفنه


ليلتها كان الحظ
اخر نعنشه
وكلمتين فى ضحكتين
بعد العشا
كان القدر جاهز
مجهز خبطته
خبط عبط شوفوا
العجينه المدهشه
سنيين عذاب تعملها لحظه سلطنه

رسالة من مبارك لبوتين

ياعم بوتين اعقل
ها تسيب السلطة ليه
ما انا ربع قرن قاعد
حصل لي بس ايه
دا الكرسي يا ابني جنة
للي بيقعد عليه
تبقي البلد ف ايدك
مفتوحة ولا البوفيه
تغرف وتملا جيبك
وجيوب ولاد الايه
وتخدم اصدقائك
في أميركا والاليزيه



اطلب من بوش فترة
وها يخسر يعني أيه
دا كريم وايده فرطة
بس انت اضحك عليه
قل له ان الفودكا ملكه
والكافيار والفيليه
قل له ان الغاز بتاعه
ما تعزش شيء عليه
قل له أنا قاعد بحسك
ومصيرك بين أيديه
ابعت نظيف بتاعك
فهمه ها يقول له ايه
يقول له بوتين عاوز
الى يطبطب عليه



لو شايفه فاتح بقه
على حد م الجيران
اعمل نفسك مطنش
خليه ياخد الامان
وبعدين اعمل منظر
يعني تطلع بيان
دي أمور أنا مجربها
وبأعملها من زمان
تبقي انت واحد منا
وتنضم للخلان



ياخسارة دا انت نونو
لسا في سن الشباب
ليه تترمل في عزك
وتسيبها للكلاب
لو فيه عندك عيال
يبقالها الف باب
دا السلطة البعد عنها
بدون الموت عذاب
ها تبقى ايامك صعبة
وتشوف النوم سراب
أنا ناوي اخدها دايركت
من الكرسي للتراب



بس انت اديني رنة
وانا ابعت لك سرور
ترزي لكن معلم
أيده تتلف في حرير
دا حجة في المغالطة
ومكلمة في الزور
يعمل من الحق باطل
ويسمي الضلمة نور
في سهرة واحدة منه
ها يظبط الامور
لو كان دستوركو عاصي
يحلبه لو حتى تور

سلام مربع للطلاب

أول كلامنا وفتح الباب
سلام مربع للطلاب
يا فرحه هلت وأحنا حزانى
يا ميت حلاوه عليك يا شباب
خمس سنين فاتت
على نار
كرامه " يوك "
وعيشه مرار


ولما حانت ساعه التار
راجعين يقولوا
ضباب وهباب
لكن يامصر خلاص ما بقاش
بكش يعيش فيكي وبكاش
طول ما الشباب فاكر
ما نساش
والثوره بتدق الابواب

حنغني

ح نغني و دايما
ح نغني
و نبشر بالخير و نمني
و نلف الدنيا الدواره
على صوت النغمة الهداره
و معانا المشرط و البلسم
في الكلمة الصاحية النواره
هو احنا كده
و حنبقى كده
ماشيين
عارفين
مع مين على مين
دايما واضحين
مش بين دا و دا
هو احنا كده
و حنبقى كده



الشارع بيتنا و غنوتنا
و الشارع اعظمها مغني
من لحن الشارع كلمتنا
على لحن الشارع
بنغني
و ان جعنا شبعنا
بتتقضى
ما نبعش الكلمة بميت فضه
و الصوت الشايل غنوتنا
بتراب الشارع متحني
هو احنا كده
و حنبقى كده
ماشيين عارفين
مع مين على مين
دايما واضحين
مش بين دا ودا

أبوح يا أبوح

أبوح يا أبوح
يا طيري يا مدبوح
أمي عليك بتنوح
وتقول يا ولدي
يادمعي يا مسفوح
يا مهجتي وكبدي



يا جرحي يا سارح
طيرتك امبارح
رفرف على بيروت
زهر الحياة بيموت
وكل شيء مجروح
وأي شيء بيروح
إلا الشجر الاخضر
أبو قلب تفاحي
خيال بيتمخطر
فوق الخطر صاحي



يا طالع الشجرة
حوّد على القمرة
هات الضيا من فوق
عمة شواشيهم
وابدر غناوي الشوق
وافرش مماشيهم
واحلف برب البيت
انك هنا خليت
حبل الوداد ممدود
لحد يوم موعود
يجي الربيع ويعود
وينور العنقود

احنا معاك

احنا معاك.. احنا معاك
ريسنا يا أنور
إحنا معاك.. إحنا معاك
تخرب تعمر


إحنا معاك يا ابو لمعه يا قمعه
ياللي خربت بلادنا ف جمعه
إحنا معاك مهما تغلبنا
نجري وراك ونبيع مبادئنا


إحنا معاك يا بايع أراضينا
ياللي سايب أعدائنا ف سينا
بكره يا ريس بكره تخلي
الاستعمار يتحكم فينا


إحنا معاك يا بطل مغوار
شوفنا الست ف خط النار
بكره الحلوه تقابل وزرا
وانت يا ريس تعمل زار


إحنا معاك يا طبيخ ف الأنجر
رز كاري وسلطة بنجر
عامللي نفسك ولا بيكاديللي
وانت منفذ أمر كسينجر

ضليلة فوق راس الشهيد

خبر بالنكته لوجيا
و الحداقه و التكنولوجيا
و التاريخ
هجم الزناتي ع الخواجه
و لبسه العمه بصاروخ
"جود" عليوة
"باد"مائير
كل عام فانتوم بخير
(وكالات الأخبار و الصحفيين 6 اكتوبر 1973)



التعليق

قبل البدا يا سامعين
ابعت سلامي للميدان
و افهم كلامي يا اسماعين
و اوزن و دقق في الميزان
تعرف مرامي يا اسماعين
من دون فلاسفة و ترجمان
اصل الحكاية يا سامعين
مش ناقصة لف و لفلفان



كان وقت نكسة يا اسماعين
و البر غاطس في الهوان
و الدم سايح اجمعين
و الأمر غرقان للزدان
و الأرض رايحة و لا معين
و العفشه نافشه
و الغيلان سانين سنانهم طامعين
ياكلوا السواكن بالمكان
و الناس حيارى يا اسماعين
بين مين و ليه و فين و كان



اذ هذا يحصل يا اسماعين
طلعوا الفلاسفة البغبغان
ناقلين كلام يملا البرام
عن حد سيف الأمريكان
اياذة بالشعر المهول
و هول و هيل و هيلمان
خلونا شبنا يا اسماعين
و كبرنا قبل الأوان



طبوا الفلاسفة في الغلط
لما الزلط قدح الزناد
نفر العناد عرق الغضب
و اقزح يا واد و اضرب يا واد
قزحت صعايدة و فلاحين
بحر الكنال ف شمال يمين
و اديني عقلك يا اسماعين
و اضغط بقلبك ع الزناد
و اجمد يا واد و اضرب يا واد
قزحوا الولاد
قزحت قلوب الناس معاهم
اسم النبي يحرس خطاهم
من خطاهم رنوا الخواجة البربري
علقة معلم عبقري
و ارتد جيش المفتري
و عيالنا نار تلحس قفاهم
اسم النبي
يحرس خطاهم



يا مصر جيشك م الصعيد
و م البحاروة و من رشيد
شبان هلايلية و طيبين
فينا الحنين و العنيد
نعشق
و لا عشق الحمام
للولف و العش السعيد
و نجود
كما جاد الغمام
باللقمه
و التوب الجديد
ندي بمزاجنا كل شيء
لأي شيء
ما دام نريد
لكن عدوك يا اسماعين
لو سخنت النار ع الحديد
و الظلم خوم ع العباد
سوى من قريب
او بعيد
حلم الحليم
يصبح جحيم
و الدم يتسمم صديد



نرمي الغضب
رمي الحطب
ع النار
تقوم النار تقيد
و احنا الرجايل يا اسماعين
في الشدة
و الوقت الشديد
نصول نجول راكبين
خيول
راكية السيول
فوق الجليد
تكسح ضباب الليل
يزول
ننطح جبال الخوف تميد
نطوي السراب طي الكتاب
و نقابل الصبح البعيد
نرجع نلاقي الدنيا نور
يا مصر
و الأنسان جديد
ننشي المداين و الكفور
في جو نور
و بكل ايد
و نجيب حليب العندليب
في المهد
للطفل الوليد
ضليلة
و نشجر التين و الزتون
فوق راس الشهيد

غول أنتيكا

كان في بلادنا غول أنتيكـا
أسـود زي الليـل والهـم
لجل يبوس عتـبه أمريكـا
يشفط عرق الناس والدم

لما النار بتطـق فـي عينـه
بيفكـر محنـاش شايفينـه
الرعشة في ايديه ورجلينـه
بسلامتـه فاكرنـا حنتخـم

الوغـد بيعـبـد أمريـكـا
ويطاطـي ولا مـرة يسـم
قتل الشهدا ديسكو وسيكـا
ويهوذا بقى الخـال والعـم

الخاين بـاع نيلنـا ودينـه
يبصم ويمرغ فـي جبينـه
هيروح فين وأحنا محاوطينة
حيموت متمرمغ في الـدم

على الأرغول

الأوله آه
والتانية آه
والتالتة آه

الأوله آه
والغدر لمن حكم
صبح الأمان بقشيش

والتانية آه
والندل لما احتكم
يقدر ولا يعفيش

والتالته آه
والحر مهما انحكم
للندل ما يوطيش

الأوله غربتي
والتانيه بلوتي
والتالته كلمتي

أرغول يا أغول
يا أبو النغم موصول
شطره تجيب شطره
والشطره غنيوه
منظومه وحليوه
والسامعين أدرى
والسامعين أشتات
زى النغم مقامات
قسم وغني وهات
وإملا المكان خضره
بالفن والقدره

والأوله آه
والتانيه آه
والتالته آه

ياعم يا قوال
يا أبو الحرير موال
كيفك
وكيف الحال
اغزل وسمعنا
واشطح مع النغمات
ودوس على المقامات
هات إللي عندك هات
لمن تشبعنا

د إحنا الحيارى دليل
مستنظرين مواويل
توصل مع المراسيل
والصهبه تجمعنا
صهبتنا صباحي
طول ما الألم صاحي
يا شوقي يا جراحي

يا حبي يا بكره
يا صحبتي فى الهم
يا شركتي فى الدم
عزوتنا
لو نتلم
ونغني للفقرا

أخضر خضرضر مال
للعشق والموال
وكان أصيل الخال
لكن فقير الحال
شد الرحال فى الحال
جاب البلاد رحال
ينزف على الأرغول
دم الصبا سلسال

أخضر خضرضر مر
على كل بحر وبر
داق الشتا فى الحر
والعشق له أهوال
رجع صاحبنا حزين
يقعد مع المساكين
ويغني للعاشقين
ويقسم الموال
يا ليلي آه يا عين

يا عم يا جمال
ترعى جمالك فين
وأنت فقير الحال
يا ليلي آه يا عين
والمرعى للأندال
يا ليلي آه يا عين

يا عم يا جمال
والصبر مهما طال
ما حتنفتلش حبال
إذ لم قلوب وإدين
يتمدوا ع الشطين
ويعمروا العيارين
ويطخوا راس المال

والأوله آه
والتانيه آه
والتالته آه

قصيدة الشهيد سليمان خاطر

أضمك وجرحي بينزف قُبل
برغم اللي خانوا
ورغم اللي هانوا
ورغم اللي كانوا في غاية الخجل

أضمك وحتما يدور العجل
بكل الأراضي اللي خُضرة وحبل
مادام لسه بغزل حروف الغزل
وبنسج غرامي قصيدة
و كلامي بينقش أسامي
بحجم الدبل

ح اضُمّك
وبحلم بحضنك وبيت
أنا اللي بـنيلك وطَميِك حييت
وضيّعت عمري
وما كنت أدري
ولو كنت أدري مكنتش بقيت
على أي صهيوني أول ما جيت

فصيلك نبينا في يوم الحساب
إذا ما التقيتي بهذا الكتاب
و لم تصدقي
و لم تعشقي
و لم تلحقي
حتى لو بالحجارة
ويركب قفاهم بشارع وحارة
بأرض المطار
وجوى الديار
ما بين الآثار
أو في مبنى السفارة

و آخر كتابي أيا مهجتي
أمانة ما يمشي ورا جثتي
سوى المتهومين بالوطن تهمتي
فداكي بدمايا اللي شاغلة الخواطر
بطول الزمان

يسلم لينا ضهر سعادتك

ألف سلامه لضهر سعادتك
إحنا فداه وف رهن إشارتك
كل الشعب بتاعنا بحاله
نسى أحزانه وخيبة حاله
وبيتمنى شفاك وسعادتك
ترجع لينا بألف سلامة
ويسلم لينا ضهر سعادتك

الأسعار راح نتحملها
والأوضاع مش ح نعدِّلها
والتغيير ماحناش عايزينه
إحنا هدفنا خلاص عارفينه
ترجع لينا بألف سلامه
ويسلم لينا ضهر سعادتك

كرسى سعادتك جوّه عيونا
وفوق الروس
مين يستجرا يهوِّب جنبه
أو يتّك عليه ويدوس
الرجلين ح نجددهالك
وبعون الله القاعده كمان
ح نجِّدهالك
وتعيش مرتاح العمر عليه
من غير ماتحس بأى آلام
في الفقرات أو ف العصعوص
بس انت كمان ماتغيبش علينا
الله يخليك وتسيبنا نلوص
دى الأيام من غير تصريح
من فم سعادتك ماتعديش
والأحلام من غير ماتعيشها
معانا سعادتك تبقى كابوس

ترجع لينا بألف سلامه
ويسلم لينا ضهر سعادتك

مرمر زماني

مرمر زماني يا زماني مرمر
مرمرتني لا بد ما تتمرمر
مرمر وترجع تاني يا اللي بعيد
والشوق في قلبي يزيد ولا يتغير
مرمر زماني يا زماني مرمر

مرمر زماني يا زمن مندار
يا حــَـر قلبي ع اللي راحوا صغار
تشهد عليك المدرسه والدار
ونجمه طالعه من بعيد بتنور
مرمر زماني يا زماني مرمر

صبح الصباح قلبي اللي حب وعانا
خلالي شمس الصبح تبقى معانا
متغربين بس الهموم جمعانا
على حلم واحد واللقا متقدر
مرمر زماني يا زماني مرمر

شوبش طرزان

زغروطه للحزب الجديد

حيدمر الحزب إللي فات

ويحطم السكه الحديد

ويربط المستحللات

ويعجز المستقدرين

ويقدر المستعجزات

ويرجع الأيام سنين

ويعيد زمان المعجزات

مع إن طرزان الوليد

ذات نفس

طرزان إللي مات !!

حارتنا

حارتنا

مجاري وناموس

مرايه وفانوس

حجاره وكراسي

شباب ع النواصي

دقون ع الكروش

عرق ع القروش

شقوق في البيوت

بيوت في الشقوق

مساء تموت

صباحا تفوق

قديمه وغبيه

لبيبه وصبيه

في ضيق خرم ابره

في غوط المحيط

على الذل صابره

دا صبر الغويط

أسانس البلاده

معسكر ولاده

خسيسه وجبانه

جريحه ومهانه

ما تسمعش ندهه

رنين الدفوف

بتاكل ولادها

حتولد الوف

مادمنا ضعنا فيها

_ ضروري نلاقيها

...

حارتنا في الحواري

على علم الصواري

لو قال فوقها

الكناري

تتهز المشربيه

ياحوش ادم

يادارنا

يا ساكن حضن جارنا

سيدنا الحسين تبارك

شهيد الانسانيه

مدد سيدنا وشهيدنا

ياقايل ومواعدنا

يكون عيدك

وعيدنا

يوم طلعة شمس جايه

...ياحاره جوا حاره

يا مجمع السهاري

من كل حي

حاره

في الحضره الادميه

مدد انس الحبايب

مدد حاضر وغايب

مدد زين الصحايب

ياساده يا موجيه

...

فيك العيدان هزيله

شايله الحمول تقيله

ولا باليد حيله

ولا الايام هنيه

سيدنا الدردير يا بابا

مدد يابو الغلابه

فوق الحواري غابه

بتمص الادميه

...

صبحك صبايا صاحيه

هاللين من كل ناحيه

مدد ياسيدي يحيى

توعدنا باللي هي

ياحارتنا

يام شيله

هزي الهلال

وهيلا

قدامك يوم وليله

ع الفرحه

والعيدي

موال السمك

يابحر قول للسمك

طول ما الشبك فوقك

لا العشق كارك

ولا رمل الشطوط شوقك

انزل قرار النجا

واغطس ولاتقبش

موج العلالي خطر

في النوه

ومغبش

داري على شمعتك

وتحب .. ماتحبش

الصبح نور ياسمك

واعشق على ذوقك

محلا القصايد

محلا القصايد
في الشدايد
والغنا
محلا الكلام والحب
أوقات الشقا

إحنا إللي تهنا ع الطريق
من بعضنا
متفرقين
والسجن هو الملتقى
آه يا رفاقه
من متاهات الطريق

لما الليالي بيتخنق فيها القمر
يمشي الصديق في الظلمه
يخبط في الصديق
والسكه بنت الخطوتين
تاخذ سنه

إحنا النهارده فين
وكام
وبكره كام
وبعده فين
وبتنا إيه
صحبنا إيه
وكنا فين
بقينا فين

فى كل يوم بنزور مكان
وكل يوم بنزيد عدد
وكل يوم نفتح بيبان
وكل يوم بنزيل سدد
وكل يوم يطلع بُنا

وكل يوم ينزل هدد
وكل يوم نحبل غنا
وكل يوم نولد مدد
جوا السجون
برا السجون
إحنا كده
لازم نكون

محلا القصايد
في الشدايد والغنا
محلا العيدان الخضر
فى الربع الخراب
إحنا إللي تهنا ع الطريق
من بعضنا
متجمعين

بنخط كلمه من كتاب
ملعونه قامه تنحني
بالقهر
من حاكم
وخان
ملعونه كلمه تنتني
فى الحلق
تهرب م اللسان
ملعونه ساعه

تنحسب م العمر يفنيها الخضوع
ملعونه لقمه مغمسه بالذل
ملعون الجبان
آه يا رفاقه
يا للي علمتوا الصلابه
للحجر
بانده لكم وسط الرتابه
والكأبه
والضجر

يا مقربين الفجر نوره
ومطلعه
مدوا المسامع
في المجامع
واسمعوا
صرخه مغني الحي من جوف العدم
اتجمعوا
اتجمعوا
اتجمعوا

هلال العيد

في نورك يا هلال العيد

يطير بينا سفين عوام

على الأحلام يودينا

نمد جسور

نعدي بحور مغطية

بخقفي مركب نور

عليه الحور مراكبية

قلوعه من نسيج الشوق

يهب الريح

ياخدها لفوق

و دفه من امانينا

بغير ملاح

تغوط في الغريق بينا

عشان نرتاح

نلاقي الموجه لجاجه

و لا نرتاح ولا حاجة

نعود بالحيرة و نعدي

بحور بالحزن مواجه

و ييجي العيد

هلاله جديد

يلاقي الناس حزين و سعيد

حسب شوقه يجود و يزيد

و يحرم ناس على كيفه

يولع للسعيد شمعه

و يرمي البسمة و الدمعه

حسب شوقه

و على كيفه

و نورك يا هلال العيد

يطير بينا سفين عوام

على الأحلام يودينا

نوّارة

قصيدة كتبها شاعرنا لابنته نوّارة , و يستجيب الله لدعائه لتصبح نوارته هي نوارة لمصر كلها و لكل المصريين الشرفاء صحفية ثورية و ناشطة سياسية من الطراز الأول
-------

نواره بنتي النهارده تبقي
بتخطي عتبه
ليوم جديد
يارب خلى
يارب حافظ
يارب بارك
يارب زيد
يارب كبر
نواره تكبر
وتبقي أكبر
فى كل عيد
لا كل جمعه
لا كل يوم
لا كل ساعه
لا كل لحظه
تنول وتخطي
وتزيد نباهه
وتزيد ملاحظه
وتخلى مصر سعيدة بيهم
ويبقوا ليها
وتبقي ليهم
غيطانها جنه
وترابها حنه

والنسمه خمره
ف قزازه حمرا
والنيل نجاشي
ما فيش ما جاشي
تمللى بيجي
أخضر مليجي
دايما يوفي
دايما يكفي
كل الخلايق
يصبح صباحه
فلاحه يمشي
على شطه عايق
والدنيا صافيه
والجو رايق
ما فيش معاكسه
مافيش مضايق
ما فيش عساكر وقهر تاني
كل الاماني بقت حقائق
يارب وفق
يارب وافق
يارب ريد
واكتب عليهم
فى كل لحظه
فرح وعيد
بسكوته بابا
حاضر يا ماما
وتقوم تدوسني
عشان تبوسني
وتنام فى حضني
وتقوم ف حضنى
وتعمل العمله
وتملا حضني


الله يجازي البعيد شيطانك
حماره كلبه
مش عيب يا ماما
كده البيحاما
مش بابا قايل
وماما قالت
من طول ما حطت
وطول ما شالت
ساعه ما تبقي الحكايه
كخه
يقولوا إا ح
قوام يا ماما ؟
بسكوته بابا
بسكوت في عينك
ما فيش معامله
بيني وما بينك
ياللا امشي قومي
حماره كلبه
باظت هدومي
ماتقومش طبعا
ولا أي حاجه
وكانه مثلا
ما حصلش حاجه
تقعد تكلضم
وتلوي بوزها
وتتجاهلني
كاني جوزها
خاصماك يا بابا
ماتكلمنيش
طظ ف عظمتك
ما يهمينش
ديتها بوسه
أو تهشيكاته
أو بسكوتايه
أو بمبونايه
حتسوقي شغل النداله طبعا
وتروحي جارّة الكلام معايا
وبوسه بابا
أديكي بوسه
سكر يا بابا
تديني بوسه
كده اصطلحنا خلاص يا بابتي ؟
كده اصطلحنا يا نوارايه
مش دي الحكايه
ولا انتي يعني
لا
يعني أيه ما تخرفيش
دي تبقي يعني
الحكايه يعنى
ملعون أبوكي
ما تاخذينيش
لو كان فى قصدك
أو ربع قصدك
أو كنتي حتي
ما تقصديش
ان انتي يعني
خاصماك يا بابا
ح تخصمني
أطلع ما فيش
أبوكي أيوه
ما كانش حاجه
لكنه حاول يعيش لحاجه
وجيل أبوكي
كان يعني حاجه
وجيلك انتي
حيبقي حاجه
ومصر تبقي ألنهارده حاجه
وبكره حتما
حتبقي حاجه
وأي حاجه
وماتكونيش حاجه
إلا وسببها
فى الاصل حاجه
وبكره لمن
قمر كو يطلع
والشمس تسطع
فوق كل حاجه
حتقولوا
كان فى المكان دا ناس
فيهم طيابه
فيهم حماس
وفى الحماس
بعض عباطه
وكانوا اخر الامر
ناس
وكان زمانهم سجون
وكانوا
مابين سجونه وامريكانه
وبين ضباب الطريق حياري
ما حد قادر يشوف مكان
حتقولوا كانوا
وياما كانوا
وياما كانوا
وياما شربوا
وياما عانوا
وياما جالهم
وياما جيلهم دفع
وكان التمن أمانه
ويا ما ناس فى المسيره
مشيت
وناس ف نص المسيره خانوا
حتقولوا كانوا
لكن يبقي فى الامر حاجه
ان اللى عربد
ما سابش حاجه
وساب كلابه
على كل حاجه
تهبش وتنهش
فى كل حاجه
ما قدرش يقتل فى أي حاجه
روح التفاؤل
بكل حاجه

يا مرحرح

يا مرحرح خالص مالص
يا رقيق جدا وسمين
يا غصين إلبان يالا للي
يا خواتي
على الطعمين


يا حلولا
يا ورده يا فله
يا معشش فى البساتين
يا بو شعر مسبسب سايح
من صهد البريانتين
يا منور فى التشريفه
ومضلم فى التخمين
يا بو كرش مدور
كور
من لحم البني آدمين


يامرحرح خالص مالص
ولا سائل فى التانيين
مرعوش كده ليه يا حلاوه
ومفاصلك ليه سايبين
وتموت فى الدبلوماسيه
وتخاف م الفدائين

وتشوف الحل السلمي
فى الراديو وفى الجرانين
تتنهد من معاميعك
وتقول قادر يا معين
ما تصح النوم وتفوق
وتشوف بتكلم مين

الشعب بخير يا مرحرح
والناس كلك عارفين
مين إللى خان يا بهيه
ومين قتل ياسين
ومين بهدل بلدنا
ومين ومين ومين

ويا مصر يا أول صورة
فى عيون المولودين
ويا مصر يا آخر صورة
فى عيون الميتيين
يا بلدنا
يا بكرة ولادنا
يام الدنيا والدين

يام الولدان المجدع
والبنات الطعمين
يحرم إسمك علينا
ونعيش متغربين
لو سبنا الذل يدوسك
أو عشنا مغلوبين
ويا سينا
أكيد جايينك
ناخذ بتار ياسين

يا كارتر يا ندل

يا كارتر يا ندل

حبيبك وصاحبك

وصاحب مراتك

وتبقي انت صاحبه

وصاحب مراته

وكان والده ايضا

مصاحب حماتك

وكان برضه والدك

مصاحب حماته

وطول عمره نافد

على استخباراتك

وشغال جاسوسك

على استخباراته

وقاعد يزود

رصيد ملياراتك

وسارق

وشايل معاك ملياراته

وراجل مامنك

وخاين ضميره

وخايف

وحاطط ف ايدك مصيره

ودابح ف بحرك

ألوف الضحايا

ودايس ف طين الدنس

والخطايا

يقوم لما يطبق عليه المحيط

تطنش يا كارتر

وتعمل عبيط

وتخلع

وتنسي الحمار والغبيط

وتاكل عيالك

بدون وجه عدل

صحيح

انت ندل

مقدمة مسلسل أبو العلا 90

سافر غريب الدار
مشوار ورا مشوار
بلد الحبايب .. فين ؟
تاه السؤال واحتار



ومشيت كتير ورأيت
ناس ع الطريق ضايعين
ورجعت تاني لقيت
ناس ع الطريق راجعين
وعملت قلبي سبيل
يهدي الحيارى دليل
وعشقت عشق النيل
للخضرة والنوار



سافر غريب الدار
مشوار ورا مشوار
بلد الحبايب .. فين ؟
تاه السؤال واحتار



يا سكه الأحلام
يا مغربه روحي
اشكيكي للأيام
ولا أشتكي روحي
علمتي قلبي يميل
للحب والمواويل
وحلمت حلم جميل
بالجنة .. وأنا في النار




سافر غريب الدار
مشوار ورا مشوار
بلد الحبايب .. فين ؟
تاه السؤال واحتار

صباح الخير

صباح الخير علي الورد اللي فتح

في جناين مصر

صباح العندليب يشدي

بألحان السبوع يا مصر

صباح الدايه واللفه

ورش الملح في الزفه

صباح يطلع بأعلامنا

من القلعه لباب النصر

سلامتك يامه يا مهره

يا حباله

يا ولاده

يا ست الكل يا طاهره

سلامتك

من الحرمان

من القهره

سلامة نهدك المرضع

سلامة بطنك الخضرا

هناكي وفرحة الوالدة

تضمي الولد

يا والده

يصونهم لك

ويحميهم

يكترهم

يخليهم

يجمع شملهم

بيكي

يتمم فرحتك

بيهم

صباح الخير علي ولادك

صباح الياسمين والفل

تعيشي ويفنوا حسادك

ويسقوهم

كاسات الذل

وبلغ يا سمير غطاس

يا ضيف المعتقل سنوي

بصوتك دا اللي

كله نحاس

صباح الخير

على الثانوي

وأهلا بيكو في القلعه

وباللي في الطريق جايين

ما دامت مصر ولاده

وفيها الطلق والعاده

حتفضل شمسها طالعه

برغم القلعه

والزنازين

حسبة برما بمناسبة زيارة ابن الهرمة

ببطارية ماركه - نانسين -

يهوديه عربيه

سته مشاغبين

وستمية ستة وستين

واتنين صنايعية

سبعة مداقرين

وسبعميه سبعه وسبعين

غاويين شيوعيه

ألف وستين

وربعميه

منهم عشرين

وتلاته وطنيه

أما الباقيين

فألف ميه وتمانين

طلاب وشضليه

تسعه وتمانين

من إللي راحوا تشرين

تحت المعديه

يبقي موافقين

حسب انضباط القوانين

والحسبه شرعيه

تسعه وتسعين وتسعميه وتسعه وتسعين

من ألف في الميه

أجري التدوين

بمبني بندر قافشين

وبلجنه مدنيه

طرطور الدين

رئيس نيابة هابشين

وشكوكو عدوية

وحسين حابسين

ضابط مباحث عابدين

والست سريه

لجنة

عشرين

شبرا ومغاغة

وقلين

أسوان دقهلية

إيران يا مصر

إيران يا مصر زينا
كان عندهم
ما عندنا
الدم هو دمنا
والهم من لون همنا

تمسك ودانك من قفاك
تمسك ودانك من هنا
الخالق الناطق هناك
الناطق الخالق هنا

الارض حبلى بالربيع وبالغنى
والجو
مشحون بالقصايد والغنا
والشمس
فوق الكل تشبه شمسنا

والثروة
ملو الارض والناس والبنا
بس العصابه الامريكانى
مربعه
فوق الغلابه
والديابه مضبعه
والصحفجيه العرصجيه الاربعه
لابسين صاجات
وكل حاكم له غنا

تمسك ودانك من قفاك
تمسك ودانك من هنا
الخالق الناطق هناك
الناطق الخالق هنا

نفس البلاوي
ع الغلابه متلتله
من فقر شوف وهم خوف
نازل بلا
والقهر زاد
والسيف على رقاب العباد
والمخبرين زي الجراد
ملو الخلا

والفنانين المومسين
والفنانات
دول شغالين
تبع وزير الاعلانات
يحصل جواز
يحصل طلاق
يحصل ممات
دول مبسوطين
ومابجين طول السنه

تمسك ودانك من قفاك
تمسك ودانك من هنا
اللى حصل فيهم هناك
لازم حيحصل
عندنا

يا بلح ابريم

يابلح ابريم يا سمارة
سواك الهوي ف العالي
هويت
على طمى النيل ياسمارة
وشربت عكار
لما استكفيت
بس احلويت قوي يا سمارة
لما اسمريت قوي ياسمارة
لفيت الشارع و الحارة
على زى نقاوتك فين
ما لقيت
يا حلاوة بنار
يا حلاوة بنار الشمس النور
يا سمارة وعمار الصحرا البور
شباك الهوى
داير ما يدور
اتاريك دبت وطبيت
بس اغلويت قوي ياسمارة
لما اتدليت قوى ياسمارة
ونزلت الشارع الحارة
سوقك
لا رخصت ولا اتذليت
يا بلح ابريم
ياسمارة
حصنت بعقدك صدر الناس
من شر النخاس الخناس
يابو قلب لا سوسه
ولا سواس
ورقيتك يا اسمر
واسترايت
الضم حبابيك بقي ياسمارة
وافتح شبابيبك لقا يا سماره
على جو الشارع
والحاره
تحلو زيادة
وتملا البيت
يا بلح ابريم يا سماره

الكلمات المتقاطعة

بدل الكوره

ولعب الفوره

وسط الغاغه

والبرجاس

تاكل زغده

تاكلك دبشه

تملا دماغك

بالقلقاس

ياللا نفكر

حتة لعبه

زي السكر

بالأناناس

كلمه ومعنى

رأسي وأفقي

يحكوا حكاية

تهم الناس

قرب قرب

ياللا نجرب

شغل مخك

ولا تحتاس

_ واحد رأسي؟

رأسي بتضرب

تقلب

تشغي بالأفكار

مسرح

والأفكار هوامه

في الدوامه

ليل .. ونهار

أبيض إسود

أخضر ..أحمر

بارد .. حامي

جنه ..ونار

سيبك سيبك

من تغريبك

بكره الليل

يطلع له نهار

_ اتنين رأسي ؟

حاكم حالي

كان طرطور

خان الدار

والجار

والنور

_كل ما فينا من حكام

نازلين

من خنفس .. وكافور

كذبوا _ أفكوا

قتلوا _ سفكوا

غدروا _ خانوا

فضحوا _ هتكوا

_ واحد أفقي ؟

شاعر داعر

ميت .. حي

طالع .. نازل

رايح .. جي

مادح سيده

مادد إيده

لايشوف حاجه

ولا يقول شي

_ كل ما فينا من شعارير

خونه

وهتيفة .. وخنازير

تجروا _ باعوا

لمعوا _ ذاعوا

أفلوا _ غربوا

تاهوا _ ضاعوا

_ اتنين أفقي ؟

شعرا تلاته بكلمه باروده

ناظم

بيرم

بابلو نيرودا (1)

_ كل ما فينا من عشاق

داقوا ما بينا

من أشواق

حبوا _ عشقوا

شبوا _ نشأوا

مروا _ فاتوا

غرسوا _ رشقوا

_ رأسي وأفقي ؟

شاعر واعر

لازم جي

يملا عيون العالم ضي

كل ما فينا من أحزان

تستنظر عاشق فنان

يأتي _ يقبل

طائر _ بلبل

حرفي _ فني

يشدو _ يغني

وطني سكني

أهلي .. قومي

منكم فيكم

صحوي نومي

أنتم فكري

أنتم عملي

منكم توقي

فيكم أملي

هيوا _ لبوا

ثوروا _ هبوا

يشرق _ يسطع

صبح _ مطلع

يزرع _ يبني

نحصد _ نجني

نمرح _ نلعب

نشدوا _ نغني

واحد رأسي

نشدوا نغني

اتنين أفقي

نشدوا نغني

تالت خامس

عاشر ميه

نشدوا نغني

نشدوا نغني

نملا العالم

خضرة عفيه

نشدوا نغني

نشدوا نغني

أغنية مسلسل عمارة يعقوبيان

دوقينا يا عزيزة
حتة من مصر العزيزة
اللي تبقى وهي شايفة
عاملة خايفة بالغريزة
هي دي مصر اللذيذة
دوقينا بالأمارة
لما يمشوا الناس حيارى
والوطن يسكن عمارة
والعمارة تبقى حارة

عليّ الحرنكش

يقال ان عم احمد ألقاها في أمسية تجمع الأدباء و الفنانين في ميدان طلعت حرب
--------

عليا الحرنكش ياريس مبارك

في عصر مزركش ملون بنارك

لأبيعك وأبايع حكومة حمارك

ملعون أبو اللي يقدر يقاطع قرارك

نهاره مقندل وليله مبارك

فهمبك وهيص وطلع في ديننا

أكيد هو طالع يشاهد جمالك

جمالك جمالنا سوزانك سوزاننا

يامحلا لمصر اللي جالنا

نسيمها في عصرك بيشوي ف بدنا



أأيد وأبايع فخامة جلالتك

وأأيد أي واحد بيمسح ريالتك

ولأنك سر باتع هننسى هبالتك

فأقعد ياريس ودلدل حمامتك

حمامة السلام حمامتك ياريس

سلامة الحمامة وسلامتك ياريس

ياريس حمامة ياريس كويس

على تل مصر ياريتك تهيص

خرابة فسيحة عليها تميس

وأأمر تطاع فشعبك مفيص

عطشان يا صبايا

عطشان يا صبايا
وانا عاشق ع السبيل
عطشان والميه ف بلدي
على عكس ما يجري النيل
والنخل العالي مطاطي
والجذع الواطي ذليل
والريح العاكس
كابس
والريح العاطي
بخيل
والنسمه اتعكر لونها
من هم الناس يا خليل
عطشان والنيل في بلدنا
والزرع اخضر
وجميل

وانا كنت امبارح خالي
واليوم دا صبحت عليل
عطشان ودوايا حبيبي
يسقيني العشق دليل
ودليل الحب عمايل
وكلام الحب جميل
وانا كل ما أقول التوبه
تغويني المواويل
تطرح في القلب جناين
تفقس فيها الزغاليل

عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبانا
ومعانا العشق دليل
والشمس تصب صبابه
والمنبع نهر النيل
وان لاموا علينا يلوموا
ما لهمش علينا سبيل
ما هو شوك العشق ملامه
والشوك في الورد أصيل
ودوني ع السبيل
ودوني ع السبيل

على الربابة

أصلي ع النبي قبل البداية
نبي عربي مشفع فى البرايا
واسلم بالوتر والقوس عليكم
ياكل السائرين ع الشوك معايا
يقول الشاعر المجروح فؤاده
من الاندال
ومن دق الرحاية



غرامي بالحروب يسبق كلامي
وآملي فى الشعوب
يخلق غنايا
وعشقي للكلام
غالب سكوتي
وكرهي للسكات
جالب شقايا
يقول ابن العرب
والجرح نازف
صديد الذل
ودموع السبايا
ونار الغل
من أيلول ويونيه
وريق المر من طعم الرزايا
رضانا بالقليل والخوف
رمانا
لحكام المواكب
والهفايا
وبيع الأرض بالعرض لعدوي
على عينك يا تاجر فى المرايه
وايه بعد المسيرة الهاشمية
على درب الخيانة للنهاية


يا شعب العرب
يا ابن الفوارس
يا رافع للنضال بيرق وراية
يا واهب للزمن
أيام وضية
بنور البذل
والجود والعطايا
صلاح الدين
ينادي من منامته
على النايمين
على دم الضحايا
لاأنا منكم ولا إنتو من ولادي
إذا رضيتم
بغير النصر غاية
ولا غير السلاح فى الحرب
يحكم ويحسم
فى المشاكل والقضايا

سجن الاستئناف - 1973

ورق - مرثية ثناء محيدلي

قصيدة كتبها عم أحمد في رثاء شهيدة جنوب لبنان ثناء محيدلي - 18 سنة - و كانت قد نفَّذت عملية استشهادية باسم الحزب القومي السوري , وهي أول فتاة لبنانية وربما عربية أيضا تنفذ هذا النوع من العمليات بسيارة مفخخة ضد قافلة عسكرية عند معبر قرية باتر في جبال لبنان.
----
ورق
ورق
ورق
أفكار ورق
أشعار ورق
شعار ورق
شعارات ورق
ثوار ورق
ثورات ورق
أحلام ورق
حكام ورق
ورق ورق ورق ورق
آه ياوطن على الورق
الحلم فيك
على الورق
والعلم فيك
على الورق
خدعني فيك صوت الورق
وسافرت فيك
على الورق
وحلمت بيك بره الورق
بستان ظليل
وقلة للعطشان سبيل
وناس ونيل
ومشربيه وحمام هديل
وبنت حلوه
وواد جميل
هجموا التتار
كلاب ورق
قتلوا الرسوم على الورق
وقالوا حلمك مستحيل
وحتى لو كان على الورق
وكفننوني
بالورق
وضيعوني
في الورق
ورق ورق ورق


مقهور وماشي في الورق
غرقان عرق
حلمي انسرق
شايل على قلبي
من غير دوا
إلا الورق
وفجأةً لمع برق
وقابلتها فوق الورق
مع إنها
مش في الورق
ولا عمرها كتبت ورق
ورق ورق ورق
شفت العروسه ع الورق
الشمس؟ لا
البدر؟ لا
النجمه؟ لا
النسمه؟ لا
البحر؟ لا
الشعر؟ لا
السحر؟ لا
لا دي الحقيقه المرعبه
قاسيه وبسيطه وطيبه
زيك وزيي وزي بنت باحبها
زي الوجود والحب
والناس كلها
كده الربيع
كده الجنى
كده المسائل تتحسب
كده الكلام
كده الغنا
كده القصيده تتكتب


آه ياسناء الجرح يا بنت الألم
كل الرايات تنكست
وانتي العلم
ورق ورق ورق
آه يا وطن غرقان ورق
وعملت انا مركب ورق
وسندباد ملاح ورق
وسبحت فيك بحر الورق
وصارعت فيك حيتان ورق
وركبت فيك امواج ورق
وعشقت فيك لحظة غرق
كشفت كنوزك يا وطن
تحت الزباله
والورق
ورق ورق ورق


يا دي الربيع لاخضر
وسط الخريف طالع
يا نبعة الصخرا
قلبي الحزين والع
إسقيني يا شابه
يمكن تطفيني
وان جفت الميه
ريقك يكفيني

آه يا سناء القهر يا بنت الأنين
يا ضربة الناس الغلابه الموجوعين
يام العيون المغرمين
أبصر بمين
يا هل ترى بعد الوطن
بتحي مين؟
ردي على الاحباب
يا زهرة العناب
إن كان دعاكي الهوا
وإن كان فتحتي الباب

آه يا سناء الرعد يا بنت الحسوم
يا نجمه يا متحيره
بين الغيوم
باسأل وأنا من كسفتي ف نص الهدوم
قلبك صغير يا حبيبتي ع الهموم
وازاي قدرتي تعشقي
وطن فسيح
مطعون جريح
الدنيا طلعت للقمر
وهو متكتف كسيح
يا هل ترى قلبك محيط
ولآ انتي يا بنت.المسيح؟

آه يا سناء الورد يا بنت الربيع
يا أغلى زهره اتفتحت هذا الربيع
ورق ورق ورق
وقعدت ألوًن في الورق
عصافير ورق
أشجار ورق
أزهار ورق
أنهار ورق

قصر الكلام جبت الربيع
ونقشت منٌه ع الورق
طرزت بالياسمين
طرٌحه وعشر فساتين
ونظمت عقد الفل
لجلِك يا ست الكل
وفردت غصن البان
على قدك الفتان
ورسمت بالحنه
شباك على الجنه
طليت من الشباك
قابلوني ألف ملاكك
رافعين على الأعناق
أنا الشهيده سناء

خالد

منين أجيب ناس لمعناة الكلام عارفين
شبه الأمارة
إذا حفضوا الوداد عارفين
شرعت من القلم رمحي
جرح قمحي
جعلت عشق الغنا زادي
وناس عارفين

يا ليل يا عين يا وطن
يا صحرا يا بساتين
يا جرحي .. يا غنوتي
يا ناسي يا غايبين
موالى من غربتي أخضر
خضارة حزين
حزين كلام الغنا
والسامعين عارفين

آه يا زمان الخنا
يا ماشي بالمعكوس
فيك أى شئ ينشري
وكل شئ بفلوس
حطيت عديم الرجا
ع الخايب المتعوس
خراب .. وحاكم أغا
يا قهرة العارفين

ركب الأغا ع البلد
ركب عليها الخوف
خاين قليل التنا
جاهل عديم الشوف
خان التراب والهوا
خنق الضمير في الجوف
وداس بنعل الوطا
ع الحق والعارفين

مين في البلد يا بلد
كان صوته من راسه
يحسب يكيد العدا
ويصون وداد ناسه
دار المدار بالخبل
وسقانا من كاسه
مين تحت حكم الأغا
ينطق يقول عارفين

يا للي قريتوا الجرايد
كله كلام مغشوش
ومركبين في الصحافه
بتوع وليها كروش
يدوسوا زر البتاعه
ينزل كلام مطروش
حمضان في حبر المطابع
وكلنا عارفين

أصل الحكايه ولد
فارس ولا زيه
خذ من بلال ندهته
ومن النبي ضيه
ومن الحسين وقفته
في محنته زيه
قدم شبابه فدا
والحق له عارفين

خالد .. خالد
يا بن الربيع والأمل
والشمس والزينه
مين يا فتي أعلمك
فعل الخريف فينا
وكبرت بره الزمان
اللي ابتلاك بينا
نايمين على وددنا
مع إننا عارفين

صاح من سكون الخرس
كروان بغنيوة
الملك لك يا فتي
يا مصري يا حليوة
رقصت نجوم الفلك
بالضي تتعانق
والشمس ويا القمر
في برجهم عارفين

شيل الغطا يا عطا
عبد السلام مددين
عبد الحميد يا فتي
قطب الرجال يا حسين
داعي المروءة دعي
والعمر مش عمرين
خالد يقول صحبتي
واحنا الجميع عارفين

الله أكبر هنا
ع الباغي والجبار
طعن الفتي طعنته
خار الأغا وانهار
المجد دا ابننا
والفارس الكرار
راكب على مهرنا
والكدابين عارفين

مين يا فتي علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم على زندك
الاسم : خالد
ولكن عاشق ولك هندك
أم الدلال علمك
طبع الأسود عندك
مين يا فتي علمك
عشق الملاح والميل

هندك يا أدهم هنا
أصلك وسلسالك
والناس يا خالد
هنا عمك
هنا خالك
يا غنوه من قهرنا
إسمك وموالك
ويا العذاب والأمل
فى دمنا عايشين

وليه أجيب ناس
لمعناه الكلام عارفين
وإحنا الأماره
إذا حفضوا الكتاب
عارفين

يا واد يا مرمر

ياواد يامرمر
يامرمرانى
اخضر خضرضر
واخضرانى
ياشمع مصرك
فى بهو قصرى
احب مصرك
تحب مصرى

نعشق فترشق
ف القلب حبة
نسقيها حبة
تطرح محبة
نسقيها تانى
ياقلبى يانى
يازهر نادى
آدى انت وادى

تشرب حبابة
تعطش صبابة
دا حب غابة
ياقلبى يابا
احلم وخضر
والصبح بدر
تشرب نداها
تسرح مداها

شجر اغانى
ياقلبى يانى
ياما انت رايق
والحب سايق
عليك دلاله
الحب ماله
حلق حرامه
على حلاله
مين فينا حاله
حلال زلاله

ومين مرافق
ومين منافق
ومين بقلبه
ومين بماله
الحب ماله
ياحبابينه
اختل شرعة
وانسب دينه
آهين يابلبل
يابو البلابل

انفض جناحك
والصبح قابل
حتلاقى بكرة
وبعد بكرة
نوارة تطرح
شجر شجرجر
ع الارض جرجر
ع البحر مكسى
وتلاقى تاكسى
وتلاقى مسرح
فى كل مطرح

وتقول يابابا
وتقول ياماما
ويحكى ان
وكان وياما
وتبقى سيرة
ونبقى ذكرى
عشان دا كله
بنحب بكره
ونعيش قبل الهنا بثوانى
مع ان بكرة
له
مصر تانى
ياقلبى يانى

مؤلف أغاني

محمد محمد محمد صليب

مؤلف اغاني

وشاعر اديب

يجوز راح تقول

إن اسمه غريب

ولكن ح أفهم جنابك قوام

**

محمد محمد

ومسلم قوي

وممكن

يهودي لئيم ملتوي

وممكن صعيدي

ومن ملوي

وممكن منوفي

وممكن مدام

* *

وممكن يقول للبصل

ياقمر

ويحلف

بإن البقر ع الشجر

وفارش خدوده

لعالم غجر

وجاهز قفاه

لاحتمال القلام

**

مؤلف أغاني

ولكن بلا

وكاتب وشاعر

ويلعب جلا

وله في الحياة كلها مشكلة

ملخصها كلمة - حتدفع لي كام-

**

وتدفع فيكتب

أدب بالطلب

تعوزه حماسي

تعوزه طرب

تعوزه فكاهي

يقول لك...وجب

كأنك في مسمط

بتطلب طعام

**

ويعرف يزمر

لكل العهود

ويمسك كمنجة

ويلعب بعود

ولو مصري دي

يحكموها اليهود

حيصبح يهودي

وممكن حاخام

**

وله حاسة سادسة

تشم الميول

وحافظ كويس

أصول الأصول

ويعرف يطاطي

ويعرف يقول

يعيش أي حاجة

ويضرب سلام

بستنظرك

باستنظرك
باستنظرك
رغم القساوه في منظرك
لحظة هروبك يارباب
م الحب لما استنصرك
باستنظرك
رغم الشتا والبرد والرعد المخيف
باستنظرك
في الشارع المشغول بأوحال الرصيف
باستنظرك


أنا أصلي حاسب موعدك
وعارف اللي بيبعدك
وانا اللي خابر تبقى مين
وانا اللي صابر من سنين
بستنظرك


بستنظرك
وباعد لك
بالثانيه عمري
واعد لك
مطرح ف بستان الأمل
وبامد لك
وف كل خطوه أمد لك
إيدي اللي شققها العمل



مدى الخطاوي ياحبيبتي وقدمي
وان كنتي خايفه م الطريق اتبسمي
ياشمس ياللي ضحتك
قمر ينور سكتك
أنا اللي عشقك يستتك
باستنظرك
باستنظرك
ياجرحي ياحلمي العنيد
باستنظرك
باستنظرك



يامصر ياحبي الوحيد
وحتيجي يوم وتصدقي
عشقي الأصيل وتحققي
حلمي الجميل وتزوقي
عمري اللي ضاع مستنظرك
باستنظرك
باستنظرك
باستنظرك

جنوب لبنان

إلى الخضرة
عيون الأهل والأوطان
وعفوا
عن سبب جهلي
تمام الإسم والعنوان
وعفوا
كوني أتشرف
باني اليوم اراسلكم
ولا أنزل منازلكم
أنا إنسان بسيط
مجهول
ماليش في الهيئه شان وكيان

لانا دكتور من الجامعه
ولا شاعر
ولا فنان
ولا محسوب من المحاسيب
ولا باتحط في الإعلان
ولا عالم
ولا عالمه
بتطلع صوري في الجرنان
أدينا في العذاب صحبه
وفوق نفس الطريق
سايرين
ومهما تبعد الصحبه
أكيد واصلين
ومتقابلين

أخويا زناتي
كان منكم
ويتكلم كتير عنكم
حكى لنا زمان
" وكان موجود "
عن الزعتر
وعن مسعود
وعن سلمان
وعن سلمي
حكاوي تشيب المولود
وعن عبله
وعبير الورد
وعن عنتر
هزيل العود
وعن إنسان
يبات إنسان
ويصبح في الصباح
طوربيد

زناتي يجز على نابه
وهو بيحكي لصحابه
ولاد الكلب دول يا ولاد
مناظر
إنما أوغاد
نهار مالمو لمتهم
برمتهم
ورمتهم
وعبوا الغدر ف سلاحهم
وسنوا سنان خيانتهم
نهارها الجو كان إسود
سواد بصفار
وجوف الأرض بيطلع
خراب ودمار
وكان يوم القيامه صحيح
على الأطفال
وع المجاريح

وكان برضك نهار أغبر
على الأندال
وعكس الريح
لأن الشهدا م الثوار
لاولوا الضهر
والأدبار
ولا خانوا الحمي والدار
عاشوا كبار
وماتوا كبار

وفوق الخد بسمتهم
دي الحاجه إللي كادتهم
ويسكت لحظة يتأمل
ويرجع تاني ويكمل
ولاد الكلب آخ منهم
يبيعوا بالدولار دينهم
ولاد الكلاب آخ منهم
حييجي اليوم وأحاكمهم

وراح مسكين
فىذات مره
ما نالش مرامه بالمره
زناتي الباقيه في حياتكم
خدوه لارناكا
مات بره
خدوه ازاي
ومات ازاي
أهم قالوا انه كان رايح
يدافع عن شرف بلده
زناتي
إللي اتولد مظلوم
وعاش محروم هنا ف بلده
خدوه قبرص عشان رايح
يدافع عن شرف بلده
ومهما نقول
ومهما نعيد
حنفتل
والسلب حيزيد

خلاصة القول ومعنى القصه والموال
سلامى للجميع واجب
نسا ورجال
خنادقكم
بنادقكم
وبرضه عشمنا فى الأتي
وهلبت القريب آتي
أخوكم فى الكفاح والهم
وبكره
فى السلاح والدم

السيما

شوف عندك يا سلاملم
واتفرج يا سلام
أفلام القرع كوسة
حتقدم فيلم خام
من مخرج الروايح
ومسبب الزكام
عن قصه واقعية
من تشخيص المدام
والفيلم لجل خاطرك
واخد مليون وسام
واتفرج يا سلاملم
ع السيما يا سلام

الناس ملهية وساكتة
والصاله بتشغى عيون
والفيلم مطلع ريحة
والناس مش لاقيه لمون
عيل فرحان بشبابه
ومغرق شعره صابون
مشكلته .. ما بيخلفشى
ومراته كمان بتخون
ودلال بتحب عطية
وعطيه جدع مجنون
لازق ف زبيدة التشة
أخت الأستاذ مأمون
اللي مراته ام قدارة
أخت محمد سعدون
جوز تانت ماريكا الهبلة
اللي مرافقه المأذون
واللي معلق نبوية
بنت الأستاذ مأمون

النيل عطشان

النيل عطشان يا صبايا
للحب والحنين
والشط
ولا النور
ولا نسمه
ولا ناي
ولا عود يا سمين


يا شاهنده وخبرينا
يا ام الصوت الحزين
يا ام العيون جناين
يرمح فيها الهجين
ايش لون سجن القناطر
ايش لون السجانين
ايش لون الصحبه معاكي
نّوار البساتين
كلك محابيس يا بلدنا
وهدومك زنازين
وغيطانك الوسايع
ضاقت ع الفلاحين
والدخان في المداخن
لون هم الشغالين


يا بنات النيل يا سبايا
ف حبال الجلادين
ما بقاش في زمانكم عنتر
لكن فيه الملايين
فارس محسوب الخطوه
يتحرك بالقوانين
لحظة ما تحين الساعة
يركب ضهر التنين
ويحطم الحواجز
ويفك المساجين

الرواي

يا سادة يا كرام

صلوا على خير الأنام

الحلم في العلم

بكره اللي جاي

أخضر

والشعر في الحلم

فارس بيتمخطر

راكب حصان السبق

شاهر

حسام قاطع

رايح يجيب النبأ

زي النهار

ساطع

ويطلع الفجر

فوق السحاب لاغبر

يا سامع الشعر

فكر

تشوف أكتر

وحدوه



حكايتنا

كانت من قديم القدم

ولسه كاينه

وياما لسه تكون

طول ما العمار مسكون

بالغفلانين ياما

طول ما الغضب مكنون

جوه الصدور

ياما


طول ما القليل حاكمين

والمحكومين ياما

طول ما احنا متخانقين

والشمتانين .. ياما

طول مااحنا نبقي كده

والظلم

فوق كل دا

ممكن تعود الحكاية

من أول المشوار

وتلف بينا الرحايا


دوار

ما بعده دوار

ويخش ديب الصبايا

في عباية السمسار

ياكل فراخنا العتاقي

ويدبح

اللي صغار

الحلم

يتأخر

والشعر

يتبخر

ويغرق الشمس

بحر الضباب الاصفر

يا صاحب العقل

فكر

تشوف أكتر

وحدووووه

عم السيد

ـ عم السيد

ـ سيد ليه ؟

ـ كل ما يمشي يلقى جنيه

ـ يعمل ايه

ـ زي البرق يدوسه فى جيبه

ـ طب ما يجيبه وياخد بيه

ـ ياخد أيه

ـ ننقش له الورد ف منديله

ـ ودا بيشم

ـ نعصر له الورد ونسقي له

ـ شرب السم

ـ طب احسن حاجه نغنى له

ـ ترا لرا لم

ـ فرخه خالتى مباركه

ـ ما لها

ـ فيها الخير و البركه

ـ ليه

ـ تزمط كل ادان

ـ ايه

ـ بيضه ورا اللقان

ـ هيييه

ـ خالتى مباركه تاخدها

ـ هييه

ـ وتطير على الدكان

ـ ليه ـ

ـ تقضي المونه والكمونه

ـ والينسونه و الدخان

ـ نعمه جزيله يا حاجه مباركه

ـ فرخه فيها الخير البركه

قصيدة لغزة

شي لله يا لغزاوية
يا وجع الأمة العربية
لا انتوا حماس ولا عباس
فلسطين هي القضية

شي لله يا لغزاوية

شي لله وعلى دلعونة
حكمونا ولاد الملعونة
والآخر خانم وباعونا
للسمسار والصهيونية

شي لله يا لغزاوية

شي لله وانتوا لوحديكوا
الله ينصركوا ويهديكوا
ويدمر دولة أعاديكوا
والأيام أهي رايحة وجاية

شي لله يا لغزاوية

شي لله ولا عادش رجوع
ويّا الخاين والجربوع
الأطفال ماتت م الجوع
والعطشان مش لاقي المية

شي لله يا لغزاوية

شي لله على أحلى كلام
ناس تصحى والأمة تنام
يعني قفاك يصبح قدام
يا لعربي وتركب عربية

شي لله يا لغزاوية

يناير2008

بيان هام من شقلبان

هنا شقلبان

محطة اذاعة حلاوة زمان

من القاهرة ومن كردفان

وسائر بلاد العرب واليابان

ومن فنزويلا أيضا ايران

ومن اى دار

أو بلد مستباحه

بفعل السياحه مع الأمريكان

هنا شقلبان

محطة اذاعة حلاوة زمان

نقدم اليكم بكل اللغات

مراسح وسيما وجميع الفنون

صحافه ومنابر وتلفزويونات

وخطبا ف جوامع وجبنه وزيتون

ونقزح ونركب جميع الموجات

ونبحث ونفهم فى كل الشئون

ودايما نلعلع فى كل الحالات

ولا حد سامع ولا يحزنون

وتسمع ما تسمع دا ما يهمناش

لأن احنا اصلا بناكل بلاش

فخليك فى نفسك وما تخليناش

نسلط عليك القلم واللسان

**********

هنا شقلبان

محطة اذاعة حلاوة زمان

يسر الاذاعه ولا يسركوش

بهذى المناسبه ولا بندعيكوش

نقدم اليكم شحاته المعسل

وبدون الرتوش

شبندر سماسرة بلاد العمار

معمر جراسن للعب القمار

وخارب مزارع و تاجر خضار

وعقبال أملتك أمير الجيوش

ما تقدرش تنكر

تقول ما اعرفوش

ما تقدرش ايضا تفول ما أسمعوش

شحاته المعسل حبيب القلوب

يزيل البقع والهموم والكروب

يأنفس يأفين يبلبع حبوب

ويفضل يهلفط ولا تفهموش

وتفهم ما تفهم دا ما يهمناش

لأن انت فاهم وعامل طناش

ح تنكر وتحلف ح اقول لك بلاش

ح تتعب دماغنا وتتعب كمان

***********

هنا شقلبان

محطة اذاعة حلاوة زمان

لأن المخبى ظهر واستبان

وكل المسائل بدت للعيان

وطلعت حكاوى ونزلت كمان

عن التهريبه وعن كيت وكان

وعن محسوبيه وعن ألعبان

ظهر فى المدينه كأن الطوفان

وغرق مراكب وسوح غيطان

وبعض المراكب ح تغرق كمان

وأزمة مساكن وأزمة أمان

وعالم بياكل فى عالم جعان

وريحة مؤمره فى جو المكان

مخطط خيانه مع الأمريكان

لدبح العشيره وحرق المكان

وفيه ناس بترغى ولازم بيان

كما ابلغونا جميع الودان

لهذا وذاكا وتلكم كمان

نقدم اليكم عروسه وحصان

شحاته المعسل وهذا البيان

.
.
.

هنا شقلبان

محطة اذاعة حلاوة زمان

بسم الله

سلام عليكم وسلمون وموز

وأما المسائل فهنجف ولوز

فيا اخوتى ويا أخوات

اليكم بيانى كما هو آت

جميع المسائل تمام التمام

وكل الكلام دا مجرد كلام

فصبرا جميلا ولا تقلقوش

وشغل الضغاين أنا ما أقبلوش

ما فيش أى حاجه

على الطلاق والعتاق بالتلاته

ما فيه اى حاجه

وقدر كمان ان فيه أى حاجه

ما لوش أى لازمه الكلام واللجاجه

وعيب ان عيل يسوق السماجه

ويعمل لى باللو ويعمل ديباجه

آنا بطبعى ضد السماسره الكبار

بحكم المنافسه وحكم الجوار

لكن مش فى طبعى

انى أعمل فضيحه

لواحد زميلى هبش كام صفيحه

ما كل الزمايل بتهبش صفايح

وكل اللى جاى مش زى اللى رايح

فيا ايها الشعب صهين تفلعص

مساء التنفس مساء الروايح

أخويا الامير بزرميط الايرانى

بعت لى السنه دى

عزمنى ودعانى وأنا قبلت طبعا

ورحنا العزومه وكانت وليمه

ما تحصلش تانى دا أيه المحمر

وأيه المكمر وايه المشمر

وايه الصوانى

وانا دماغى تعبت ولفت صراحه

من الفخفخه والهنا الاصفهانى

هناك يعنى مثلا اذا شربت طافيه

تمز بكوارع وبسطرمه ضانى

ما شفتش هناك

ناس بتحقد عليهم

ولا ناس بتشتم فلان الفلانى

لأنه اشترى عزبتين من شطارته

وحكمة ادارته وطلع مبانى

وبعد الوليمه استلمنا الهدايا

مفضض ومدهب وقز وقيشانى

وطبعا أخويا الأمير قال لى حاجه

ح اقولهالكو طبعا اذا الوقت ناسب

ح يطلع لى عيل بدون اى حاجه

ويعمل لى فلحس ويقعد يحاسب

دا حقد اشتراكى أنا ما أقبلوش

ولو هو ابنى أنا ما اعتقوش

كلام عن سماسره كلام عن دعاره

حاجات مش صحيحه جمل مستعاره

وعايزين يخلوا البلد اردغانه

وعايزنى اسيب البلد من زمان

وأنا مش ح اسلم واسيب الأمان

ولا بالبوليس والنيابه كمان

فيا ايها الشعب كمل جميلك

وصبرا واذلم حتيجى المصارى

وتاكل وتشرب تبع ما يآتيلك

وتغرق فى بحر العبيد والجوارى

وترسم حياتك حسب ما يرائيلك

ونملا الحوارى فساقى وقصارى

تسبح بحمدك وتشكر جميلك

وفضل الزباله وطفح المجارى

ختاما سلاما وآخر كلاما

ضرورا

يسود الهدوء والوئام فماذا والا

ح طربقها واللا اهرب فلوسى

واسافر قواما سلام عليكم

وسلمون وموز بصفتى رئيسا

وابا وجوز

الحاوي

توت حاوي حاوي توت

خش اتفرج هرج فوت

زاحم لاحم عارك اضرب

ناضل فاضل خطوه وتقرب

الحق نفسك

قبل مايلعب

وامسك نفسك

جوه الملعب

دانت ح تضحك لما تموت

توت حاوي

حاوي توت





توت حاوي سبع مرات

لعبه جديده

ياحضرات

دق الفول ويالكرات

هات الشطه والبهارات

شخبط لخبط حضر طاسه وكب الزيت

ولع طلع ريحه مريحه ف جو البيت

ح تلقى عجينه عجيبه متينه

لاتقول تينه ولابروتينه

كل ياصنايعي

كل يافقير

كل ماهو لسّه الفول قناطير

آه ياسلام لو عود جرجير

تفضل تاكل لما تموت

توت حاوي

حاوي توت




توت حاوي حاوي توت

خش اتفرج هرج فوت

قعده فكيهه

حتسمع فيها

حكاية البيضه والكتكوت

يحكى ان

ولازم يحكى

وكان ياما كان

قبل الجنه

كان فيه بيضه وفرخه كمان

دبحوا الفرخه طبت سارخه

قامت البيضه طقت شارخه

طقشت فقست فرخ فصيح

يدن يهلل ويصيح

حتى ان كان على وش دبيح

يفضل يدن لما يموت

توت حاوي

حاوي توت




سحر مفيش دا كلام تهويش

نفض مخك يابو درويش

كل مافيها الدنيا دي فيها

ناس بتبكش

لجل تعيش

حابس حابس

عفريت كابس

ينزل قالع

يطلع لابس

واللي يرقص

ع المسامير

واللي بإبره بيفتح بير

واللي بينفخ في المزامير

يفضل ينفخ لما يموت

توت حاوي توت

بيانات على تذكرة مسجون

الاسم : صابر

التهمه : مصري

السن : اجهل اهل عصري

لرغم انسدال الشيب ضفاير

من شوشتى

لما لتحت خضري

المهنه : وارث

عن جدودي

والزمان

صنع الحضاره

والنضاره

والامان

البشره : قمحى

القد : رمحى

الشعر : اخشن م الدريس

لون العيون : اسود غطيس

الانف : نافر كا لحصان

الفم : ثابت فى المكان

واما جيت ازحزحه

عن مطرحه

كان اللى كان

جهه الميلاد: فى أي اوضه مضلمه

تحت السما

على ارض مصر

من أي دار وسط

النخيل

مطرح ما يجري النيل

ما دام ما يكونش قصر

الحكم: من سبع تلاف سنه

وانا راقد سجين

اطحن على ضراسي الحجر

من الضجر

وابات حزين

الاسباب : سالنى سائل

حبستك طالت

وليه

ولانى طيب

وابن نكته

ما فيش مخالفه ركبتها

ضد القانون

لانى خايف

والقانون سيفه ف اديه

تسأل عليّ المخبرين

فى أي حين

تسمع وتفهم قصتي

الف وبيه

الاسم صابر ع البلا ايوب

حمار .. شيل الحمول من قسمتى

والانتظار

اغرق فى انهار العرق

طول النهار

والم همى فى المسا

وارقد عليه

عرفت ليه ؟

شقع بقع

أنا الاديب ولا تعرفنيش

تقرا لي لكن ماتشوفنيش

كلامي لاهو مدهون ورنيش

ولا المعاني عليها غبار

شقع بقع ياديل الفار



ياشعب مصر ياخم النوم

ماتفوق بقى وتشوفلك يوم

والثورة قامت في الخرطوم

وانت اللى نايم بالأسرار

شقع بقع ياديل الفار



ياشعب ثور داهيه تسمك

وشيل أصول أسباب همك

عصابة بتمص في دمك

والاسم قال ضباط احرار

شقع بقع ياديل الفار



خدوا اليهود غزه وسينا

وبكرة يبقوا وسطينا

والراديوهات بتغدينا

خطب ونتعشى أشعار

شقع بقع ياديل الفار



الشيخ امام قال كلمة حق

الست ثومة قالت لك لا

وأبو النجوم على ودنه اندق

في المعتقل والدنيا نهار

شقع بقع ياديل الفار

ده شعب فقري

نظرًا لأن النعمة فاقت حدها

ولأننا مش قدها

ولأن فعلاً إنجازاتك

فوق طاقتنا نعدها

ولأننا غرقنا في جمايل

مستحيل حنردها

نستحلفك.......نسترحمك

نستعطفك......نستكرمك

ترحمنا من طلعة جنابك

حبتين

عايزين نجرب خلقة تانية

ولو يومين

إسمع بقى

إحنا زهقنا من النعيم

ونفسنا في يومين شقا

عايزين نجرب الإضطهاد

ونعوم ونغرق فى الفساد

بيني وبينك حضرتك

دا شعب فقرى مايستحقش جنتك

أنا عارف إنه شعب ماينفعوش

إلا شارون وبلير وبوش

عايز يجرب الإمتهان

ويعيش عميل للأمريكان

بيمد "غازُه" لإسرائيل

ويومين كمان ويمد النيل

أهو يعنى نشرب ميه واحدة

ندوب فى بعض

ماء وماء وماء

ونفض سيرة الإنتماء

وبلاها نعرة وطنطنة

وتبقى البلاد "مستوطنة "

متسلطنة ومتسرطنة

إيه اللى خدناه م الكرامة والإباء

حبة خطب وكلام...كلام

إحنا راهننا على النظام

ورضينا بخيار السلام

خيار حنسد عين الشمس بيه

علشان مايطلعش النهار

ويطلع لمين؟

حبة معارضة مغرضين؟

وحسب بيان السلطة

شلة مأجورين؟

ياعم فضك سيرة

وإرضى بقسمتك

دا شعب مش فاهم أكيد

يالا أُطرده من رحمتك

وإن كنت غاوى الحكم

خليك مطرحك

حاغطس وأقب وأعود

بشعب يريحك

راضى وعمره مايجرحك

أخرس وما بيسمعش

وأغميلك عينيه

مش كل قرش يبص فيه

مايقولش لأه، وفين، وليه

يضرب ينفض فى السليم

وعلى الصراط المستقيم

كل اللى يعرف ينطقه

عاش الزعيم

يحيا الزعيم

على ضريح عبد الناصر

السكه مفروشه
تيجان الفل والنرجس
والقبه صهوة فرس
عليها الخضر بيبرجس
والمشربيه عرايس
بتبكي
والبكا مشروع


من ذا إللي نايم وساكت
والسكات مسموع
سيدنا الحسين ؟
ولا صلاح الدين ؟
ولا الإمام ؟
دستور ياحراس المقام
ولا الكلام بالشكل ذا ممنوع ؟ !
على العموم
أنا مش ضليع
في علوم الانضباط

أبويا كان مسلم صحيح
وكان يصلي ع النبي
عند الغضب
والإنبساط !
أبويا كان
فلاح تعيس
فى ليله ظلمه
خلفوه
وف خرقه سودا
لفلفوه
وف عيشة غبرا
طلعوه
وف عشه ما يله
سكنوه
ولصموه
وطلسموه
ودجنوه
وجهزوه
وجوزوه على عماه
فكان محير في هواه
ما بين أمي وما بين الجاموسة

وكان يخاف
يقتل ناموسه
وكان خجول
خجول
خجول
لكنه كان دايما يقول
أستغفر الله العظيم
من باب الاحتياط !
أبويا طلعتوه حمار
فكان طبيعي
يجيبني جحش
لا أعرف نبي
من أجنبي
ولا مين ما جاش
ولا مين ما راحش
موسى نبي
عيسى نبي
كمان محمد كان نبي
ويا قلبي صلي ع النبي
وكلنا نحب النبي
وكل وقت وله أذان
وكل عصر وله نبي

وإحنا نبينا كده
من ضلعنا نابت
لا من سماهم وقع
ولا من مرا شابت
ولا انخسف له القمر
ولا النجوم غابت
أبوه
صعيدي وفهم
قام طلعه ضابط
ضبط
على قدنا
وع المزاج ظابط
فاجومي من جنسنا
مالوش مرا عابت
فلاح
قليل الحيا
إذا الكلاب سابت
ولا يطاطيش للعدا
مهما السهام صابت
عمل حاجات معجزه
وحاجات كتير خابت
وعاش ومات وسطنا
على طبعنا ثابت
وإن كان جرح قلبنا
كل الجراح طابت
ولا يطولوه العدا
مهما الأمور جابت

هلي يا شمس البشاير

هلى يا شمس البشاير
طابت وآن الأوان
طلي وحلي الستاير
نور الأشاير يبان
وارخي الضفاير مناير
فوق الزمان والمكان
مصر الشباب العزيزة
قامت وكان اللي كان
مصر اللي خاضت ليالي
بحر الضلام الرهيب
تسهر عليها المبالي
تزعق
ولا من طبيب
عرف بلاها ودواها
بعيون شبابها النجيب
تسلم عيون الأطبا
ويعيش حكيم الزمان
قال الشباب المداوي
شقشق يا نور الصباح
تظهر أصول البلاوي
تطهر عيون الجراح
يخضر عود الأغاني
يسري العبير
فى البراح
تسرح فى مصر الأماني
زي النشيد والأدان
مصر العلوم والصنايع
والفلاحين
والغيطان
مصر الجنود بالمدافع
متسلحين للميدان
مصر السلام
بالمعارك
يفرش يغطي المكان
ينده يا شمس الحقيقه
طلي .. عليكي الأمان

كل ما تهل البشاير

كل ما تهل البشاير من يناير كل عام
يدخل النور الزنازن
يطرد الخوف و الضلام
يا نسيم السجن ميل ع العتب و ارمي السلام
زهر النوار و عشش في الزنازين ...الحمام

من سكون السجن صوتي نبض قلبي من تابوتي
بيقولولك يا حبيبتي
كلمتي من بطن حوتي
سلمي لي عالحبايب
يا حبيبتي
سلمي لي
كل حب و له نصيب من سلامي
بلغي لي
احضني العالم عشاني
بين عيونك
و ابعتي لي
نظرة
منها اشوف حبايبي
و اشفي قلبي
و اسأليلي
كل عالم في بلدنا
كل برج و كل مادنه
كل صاحب من صحابنا
كل عيل من ولادنا
حد فيهم شاف علامة من علامات القيامه
قبل ما تهل البشاير
يوم تمنتاشر يناير
لما قامت مصر قومة بعد ما ظنوها نومه
تلعن الجوع و المذلة و المظالم و الحكومة؟

سلمي لي ع الولاد السمر
خضر العمر في عموم الحواري
سلمي لي
ع البنات المخطوبين في المهد لسرير الجواري
و اسأليلي بالعتاب كل قاري في الكتاب
حد فيهم كان يصدق
بعد جهل و بعد موت
ان حس الشعب يسبق اي فكر و اي صوت
هي دي مصر العظيمة
يا حبيبتي
هي مصر
اللي فضلتي في هواها
عشنا
على الف قصر
هي دي
يا عزة
مصر

رسالة إلى السجن

حبيبي يا مجرم يا سافل
يا دون
يا رب السوابق
يا رد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لان البلد دي
حاكمها القانون
توقع ما بينى وما بين
الحكومه ؟
دي برضك حكومه
وأنا إيش أكون
أديك رحت مورته
وحتروح بشرطه
وحيفسحوك
فى جميع السجون
وأنا مش ح أزورك
كما كنت فاهم
ولا كنت فاهم
ولا يحزنون

عشان انت مصري

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟

البتاع

يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف
على طول
والناس تموت في البتاع
فيبقي مين مسؤول ؟
وإزاي حتفتح
بتاع
في وسط ناس بتقول
بأن هذا البتاع
جاب الخراب مشمول
لأنه
حتة بتاع جاهل غبي مخبول
أمر بفتح البتاع
لأنه كان مسطول !
وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في
البتاع
ولا مقري
ولا منقول
والخوف
سرح في البتاع
خلا
الديابه تصول
ويبقي البتاع في البتاع
والناس صايبها ذهول
وأن حد
قال دا البتاع
يقولوا له
مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات
مقتول

على حسب وداد جلبي

على حســــــــب وداد قلبي ومزاج البلديات
أبعد م الشين واتاخر وإجول للزين سلامات
على حسب وداد قلبي

على صهد الآرض السمرا أنا أبوي النيل سواني
ممصوص وخشن من بره زى الطينه إلآسوانى
وألخضره ف قلبي وقلبي دايما على طرف لساني
ولساني حصاني رماني وتعبنى كتير وأذاني
ياما جابني وياما وداني من جولة في الحكايات
على حسب وداد جلبي

على بحر النيل يا جناوي ضليلة وجلة ميه
وناسات ع يجولوا حكاوي ع تخلي اللجمه هنيه
وشطوط مزروعه غناوي وغيطان ألحان مروية
وألزين يغزل مواله من كلمة عمه وخاله
وأنا زى ناساتي ما جالوا لفيت الجول حكايات
على حسب وداد جلبي

ابن البلد

بعد السلام والمرحبا
يا اولاد بلدنا يا طيبين
نفرش كلام المصطبة
واضح لكل السامعين
مصر الحبيبة الطيبة
أم البنيّة والبنين
ايش حالها في عز الصبا
ايش حال ولادها المخلصين
وسط العواصف مركبة
بين ريح شمال وريح يمين
جابوا الطبيب ابن الحلال
كشف مكان الداءوقال
أهل البصيرة في البلد
جواب لكل السائلين
قال البلد عاوزه ولد
ياخد بتار المظلومين
ولد يعوض اللي راح
ويعلا فوق كل الجراح
ويمد إيده في الضباب
يشد أنوار الصباح

فيكم ولد يا سامعين ؟
(يرد الكورس): أجدع ولد
طب هوه فين ؟ وهوه مين؟
كورس: ابن البلد
يا ابن البلد يا ابن البلد
الوقت وقتك يا ولد
يا قلب مصر ونبضها
يا ابن البلد يا ابن البلد
يا صبحها
يا ابن البلد
يا ربحها
يا ابن البلد
يا قمحها
يا ابن البلد
يا رمحها
يا نور سماها وأرضها
يا ابن البلد

آدي كلام المصطبة يا اولاد بلدنا يا طيبين
بعد السلام والمرحبا واضح لكل السامعين

هو شي منه

رثاء في "هو شي منه" قائد المقاومة في فيتنام أثناء الاستعمار الإمبريالي الأميركي
.
.
يادى العجب يارجب
يامرتب الحكايات
اسمع وشوف واندهش
واكتبها فى الكتبات
عسى الكلام ينقرى
لو قلبوا الصفحات
خلى الشعوب والدول
تتعلم البطولات

الحزن طول عمرنا
له من حياتنا حياه
نقضيها فى النهنهه
ونضيع الأوقات
نبكى على اللى مضى
ونعيش مع اللى فات
شوف العجب يارجب
واعجب من الروايات
شعب الملاحم بكى
نزلت دموعه دانات
ع الظالم المفترى
حلفت عليه ما يبات

اول ما طار الخبر
بين الجنود اشاعات
دمع البارود انهمر
دفعات ورا دفعات
واحده تصيب العدا
تردى العدا عشرات
والتانيه من عفوها
زعق الفضا زعقات
والتالته تحمى السما
من فانتوم الخواجات
والرابعه من بعدها
المية والألفات
فى الأرض والسموات
يغسل طريق البشر
ويبدد الحشرات
****
ولما ذاع الخبر واتأكد الخبر
صاح السلاح فى الحرس
قال هوشى منه مات
الحاكم اللى زهد فى الملك واللذات
و الزاهد اللى حكم ضد الهوى واللذات
مات المسيح النبى
ويهوذا بالألوفات
مات الصديق الوفى
للخضره والغابات
مات بس فات للأمل
فوق الطريق علامات
لو سار عليها العمل
طول الطريق بثبات
تهدى الطريق سكته
وتقرب المسافات

فات الهوى

فات الهوى سلم علي
بات السهر ساكن عنيه
عاد الهوى بين يوم وليله
وإحنا سوا يا نور عنيه
فات الهوى
آه يا أسمراني
لحظه ما فات لحظك
ناداني
عاد الهوى قام التقاني
زى الهوى
قلبي ف إيديا
فات الهوى
يا واد يا خمري
سلم
وأنا سلمت أمري
عاد الهوى بالشوق يا عمري
يملا السهر والنوم عليّ
فات الهوى
آه يابن عمي
زى الهوا شعلل فى دمي
وأما شكيت الوجد لآمي
ضحكت
وباستني ف عنيه

الشاعر الأكره

أنا الأديب لما أتكلم ما باخليشى
لأني جاهل
وفاجومي
ومخ مفيشي
وأي تغيير في حياتي
ميتعبنيشي
وأنا اللي قولي على نولى
مش من بره
الله الله يا بدوي
مش من برة

وأبدأ كلامي عن الأشعار
واللي زانوها
بيرم وخيرى
وكل الناس اللي صانوها
أما الكلاب عند الجواسيس
واللي خانوها
فدول كلاب
وما مبنذكروش هنا بالمره
الله الله يابدوي
هنا بالمره

ياعم بيرم وحياتك
واللي أماتك
وخلا الناس مآبين
عايشيين على مقالاتك
وواد مباحث يتطاول
على مقاماتك
لاجعل الشعرا الأندال
مسخه وعبره
الله الله يابدوى
مسخه وعبره

فى كل مولد ياشويعر
لفلفت حزام
ورقصت تبع المزيكة
وكنست مقام
وصاحبت كل الألاتية
ومشيت خدام
لكل عالمة وشبشبها
حسب الأجرة
الله الله يابدوى
حسب الأجرة

حرباية يابن الحرامية
مية المية
على كل لون جاهز تركب
ع التسقية
أما انت مالح ومزبط
وابن غبية
وحصانك اللي راهنت عليه
يخسر بكره
الله الله يابدوى
يخسر بكره

الطبل غير الشعر يا واد
ماتهبلشي
وأى شخص يكون شاعر
مايطبلشي
ياتقول كلامك من جواك
يا متقبلشي
ملعون ابوك طالع نازل
شاعر أكره
الله الله يابدوى
شاعر أكره

أستغماية

غمي عيونك
سد ودانك
إفتح بقك
قول حرفين
قول انا فين
الشاطر فيكو
يحزر فزر
في دقيقتين
والإشطر منه
اللي يحزرها
في غمضة عين
والأشطر خالص ما يحزرش
يقول انا فين
والإشطر أشطر
اللي يبص يشوف بالعين
انا فين ؟

فيه ناس
اختلف في الموضوع
وحكاوي اتقالت
عن مواضيع
والناس لا مؤاخذة
في زمن الجوع
يتعشوا كلام
يفطروا تشنيع !

فيه واحد شافني
بلبده ولاسه
في باب اللوق
والتاني
لمحني بقفصين موز
علي باب السوق
والتالت شافني
في كاديلاك
راكب مع بنتين
والرابع
شافني ف طنطا
بابيع
بلابيع ونشوق !
وصحافه الصاوي
والورداوي
والجمال
وأباظه ولاظه
وباقي الخفافيش
والأندال
بتأكد جدا
جدا جدا بالتدقيق
إن انا محبوس
وباروح يوميا
للتحقيق!

طب اصدق مين
وأكدب مين ؟!
ماهي حاجه تمخول أيها عاقل
وانا مجنون
وباكلم نفسي
وعقلي صراحه
ماهوش مضمون

لو كنت بلبده ولاسه
وماشي ف باب اللوق
طب إيه مشاني
مفلس جدا
جنب السوق ؟!
لوكنت بدأت
كتاجر فاكهه
وبقفصين ؟
مش كنت زماني
معلم طمبه
وجوز اتنين؟
لوكنت ف كاديلاك
زي ما قال
التالت بيه
ومعايا بنات
زي الشربات
طب ح انزل ليه ؟!

لوكنت يا طنطا
بابيع بلابيع
وسطل وبخور
مش كنت زماني
مدير على جامع
أو مأمور ؟

وصحيح الصاوي
والورداوي
والجمال
حابسين أفكار الناس
في بلدنا
وعال العال
إياك قاصدين
إن انا مسجون
زي الملايين ؟
كده يبقي تمام
ولأول مره
ح اقول " صادقين "
بس انا لا مؤاخذه
وبالتدقيق
ماحصلشي معايا
ولا تحقيق !

مش حاجه تحير
طب أنا فين ؟
حزرتوا خلاص
فزرتوا خلاص ؟
عارفين
أنا فين
أنا ساكن قلبي ومتونس بالناس
والناس الونسه كتير
ماليين القلب
وشاغلينه
سارحين في الدم
وفي التفكير
وجناين قلبي العمرانه
بالناس الأزهار العصافير
سايعاني وسايعه اللي باحبه
وتساعي معايا رفاقه كتير
شايفين انا فين ؟

الشاطر فيكو
يحزر فزر
في دقيقتين
والأشطر طبعا
حيحزرها
في غمضة عين
أنا ...... فين ؟

أبو العلا 90 - الخاتمة

سيبه سيبه سيبه
خليه ياخد نصيبه
دا واحد عصر حجري
وشايل قلب غجري
لو هو قطر مجري
بكره الجنان يصيبه
ويخرج عن قضيبه
وراك وراك ياشاطر
يا ملخبط المسائل
يا مقدم الأواخر
ومأخر الأوائل
إسمك ؟ ما اعرفش اسمك
ولا حتي شفت رسمك
ولا تخليت كسمك
بعيده من قريبه
لكن لازح اجيبه
وراك وراك يا غاوي
تتسلى بالمواجع
وتشرب القهاوي
بمناسبة الفواجع
شرك شعلل شرارك
وحرق جارك ودارك
وان كان على قرارك
لو حتى فين ح اجيبه
ومش ممكن ح اسيبه

عينيكي سكة سفر

من مسلسل أبو العلا 90


وعنيكي سكة سفر
في الصحرا .. والواحه
والشوق .. ودنيا السهر
لانوم .. ولا راحه
ولا الرموش السود
بينادوا ع الموعود
وانا اللي خدني الغزل
ع الجنه طوالي
وشربت نهر العسل
وغزلت موالي
وسهرت فيكي الليل
والناس تقول يا ليل
ورجعت سكة سفر
في الصحرا .. والواحه
في عنيكي
وانا باقول يا ليل
ولكل عاشق ليل
يا جنه الملتقي
مين فات سأل عنا
ومين عطف بعدنا
ع الورد .. يا جنه
من لحظه كنا سوا
والعشق كا تباريح
ورجعت سكة سفر
في الصحرا .. والواحه
في عنيكي

الشيخ عاشور

سلام مربع يا بلد
للشيخ عاشور
قلب الاسد
سلام يا واد
على دا ودا
لو دستة منه
فى البلد
ما كانش كان
كل اللي كان
ولا كان دا حالك يا بلد
مدد يا شيخ عاشور
مدد
مدد يا شيخ عاشور مدد

----

ملحوظة: بحثت عن قصة الشيخ عاشور طويلا , و وجدت انه كان من اعضاء مجلس الشعب و قد هتف في المجلس "يسقط أنور السادات" لاعتراضه على الطريقة التي يألههه بها أعضاء المجلس , و بالطبع تم طرده من المجلس

شجرة لو

يا أماني يا شجره ف بستاني
بتفرع يا ما وتعلو
وبيستناها الفكهاني
ولا تطرح غيركلمه لو
لوأغمض وافتح تانى
الاقينى طاير فى الجو
والشمس عروسه مقابلانى
بالطرحه الدهبي وبالضو
لاخطف طرحتها وفرحتها
وانزل فى اللحظه وفى التو
ابدر انوارها واشواقي
ع الارض تنور تحلو
والمس بالكف المتحني
ع الزرع يبشر ويمني
والحب يرعرع
ويغني
والعمر يهني
ويغلو
ويقوموا الناس فى الفجريه
والصبح بيضحك هأ او
والليل بعيونه الحراميه
بيعيط خايف م العو
وامانى كتيره مشاغلانى
ممكن تتحقق يوم او
على راي صاحبنا البستانى
لو تطرح يوم شجره لو

كلامنا عن إيران

كلامنا عن ايران
ما لوش طبعا مكان
فى اعلام الخيانه
وصوت الامريكان

لان الامن شايف
بان الأخ خايف
ليلزق على الشفايف
ويلبس فى الودان

كلام عن الخيانه
ومن عالم جعانه
فتظهر الادانه
على الشاه اللى خان

ادانه يعنى ثوره
ما تقبلش المناوره
وفضح وكشف عوره
واخر بهدلان

فليه الامن يرضى
يبحبح للمعارضه
دى عالم يابا مرضى
واغلبهم جعان

وهكذا الطريقه
طناش على الحقيقه
فتبقى الناس غريقه
وتسمع شقلبان

لهذا أو لذلك
حنمشى فى المسالك
ونطلع م الزمالك
نخش الترجمان

وكلمتنا نقولوها
حليب من صدر أبوها
فناسنا يسمعوها
فيحصل بغبغان

فهات ودنك يا خلي
اقولك وانت قوللي
وسيبك م اللي واللي
ونحكى عن ايران

شعبي حبيبي

يا شعبي حبيبي
يا روحي يا بيبي
يا حاطك في جيبي
يا بن الحلال
يا شعبي يا شاطر
يا جابر خواطر
يا ساكن مقابر
وصابر وعال
يا واكل سمومك
يا بايع هدومك
يا حامل همومك
وشايل جبال
يا شعبي اللي نايم
وسارح وهايم
وفي الفقر عايم
وحاله ده حال
احبك محشش
مفرفش مطنش
ودايخ مدروخ
وأخر انسطال
احبك مكبر
دماغك مخدر
ممشي أمورك
كده باتكال
وأحب اللي ينصب
وأحب اللي يكدب
وأحب اللي ينهب
ويسرق تلال
وأحب اللي شايف
وعارف وخايف
وبالع لسانه
وكاتم ما قال
واحبك تأيد
تعضد تمجد
توافق تنافق
وتلحس نعال
تحضر نشادر
تجمع كوادر
تلمع تقمع
تضبط مجال
لكن لو تفكر
تخطط تقرر
تشغل لي مخك
وتفتح جدال
وتبدأ تشاكل
وتعمل مشاكل
وتنكش مسائل
وتسأل سؤال
وعايز تنور
وعايز تطور
وتعملي روحك
مفرد رجال
ساعتها حجيبك
لا يمكن اسيبك
وراح تبقى عبرة
وتصبح مثال
حبهدل جنابك
وأذل اللي جابك
وحيكون عذابك
ده فوق الاحتمال
وامرمط سعادتك
واهزأ سيادتك
واخلي كرامتك
في حالة هزال
وتلبس قضية
وتصبح رزية
وباقي حياتك
تعيش في انعزال
حتقبل ححبك
حترفض حلبك
حتطلع حتنزل
حجيبلك جمال

فرحانين و مرعوبين

مقدمة

الثورة..
مارد رفض و انتفض
زلز عروش العار
الشمس ولا الجبل
ولا المحيط هدار
ولا القمر فى السما
فجر سحاب النار
ولا الربيع انتشر
غطى الوجود ثوار
ولاالنشيد انطلق
عالى على الاسوار
طير سلاح الحرس
من لمسه الاوتار
ولا نسيم الصبا
ولا هوا الاعصار
انت الجميع كلهم
والكل فيك حضار
يا شعب لما رفض
يا شعب لما اختار
سطر بدم الشرف
انشوده الاحرار
نار الخيانه حطب
نار الشعوب صبار

القصيدة
فرحانين فرحانين فرحانين
كل ثورة واحنا دايما فرحانين
اللي ماتوا ف المعارك
فرحانين
واللي حضر واللي شارك
فرحانين
واللي ساكنين الخنادق
فرحانين
واللي ماسكين ع المبادئ
فرحانين
واللي شايلين شوق لفكرة
فرحانين
واللي حاملين هم بكرة
فرحانين
واللي معدتهم جعانة
فرحانين
واللي كلمتهم أمانة
فرحانين
إحنا ملح الأرض وتراب العجين
كل صناع الوجود والمبدعين
عد موج البحر ونجوم الليالي
عد رمل الأرض واكتر م السنين
كل ثورة واحنا دايما فرحانين
فرحانين
فرحانين
فرحانين

مرعوبين
مرعوبين
مرعوبين
مش باقولك ياحبيبي
مرعوبين
واللى رقصوا فى حضن كارتر
مرعوبين
اللى كان فاكرينه عنتر
مرعوبين
واللى سافروا لجولدا ماير
مرعوبين
و اللي بيغلو السجاير
مرعوبين
والنسايب والقرايب
مرعوبين
والمشايخ فى الزكايب
مرعوبين
والسفاك المصريكانى
مرعوبين
والفراخ الامريكانى
مرعوبين

كل حكام الخيانة الماجورين
والسماسرة والحشم والطباخين
مهما حاولوا يخوفوكوا
بالعساكر
فتشوهم حتلاقوهم مرعوبين
مش باقولك ياحبيبى
مرعوبين

سالمة يا سلامة - اتفرج يا سلام

بانوراما الدنيا فونية .. صندوق الدنيا عصري
الصورة من أميركا .. و الصوت من جوا مصري
لو تفهم كل قصدي .. أوهبلك نص قصري
و اكتبلك الوصية .. على جناح الحمام
و اتفرج يا سلام لم .. و اتفرج يا سلام


شوف عندك يا سلام لم .. و اتفرج يا سلام
هزلية مرسحية .. على تياترو السلام
سلام كلام أغاني ... و عليكم السلام
ما عاد على الغلابا عايد غير الكلام
و الحالة كل مادا يا سادة يا كرام
و اتفرج يا سلام لم .. و اتفرج يا سلام


سالمة يا سلامة .. و دليلة رجعت بسلامة
مصرية و من مواليد شبرا .. من تحت نفقها و مجاريها
لو كانوا ما حرقوش الاوبرا .. كانت حتلعلع لياليها
بالغنوة المدهونة شفايف .. غرقانة و سايحة ببلاويها
سيد درويش اللي حيلتنا .. سرقوه و باعوه بيعة ندامة
سالمة يا سلامة .. و دليلة جات بالسلامة ..


سالمة يا سلامة .. كوكا كولا جات بالسلامة
نشروا الاعلان ... ملو الجرنان
جوا البراويز الدهبية
و التلفزيون بالصوت و اللون
كوكا كولا هي الاصلية
اشرب يا خفيف .. بطّل تخاريف
بلا رجل الطور بلا وطنية
كوكا كولا تفوق و تروق ضد الافكار الهدامة

سالمة يا سلامة .. طير بينا و رفرف يا حمامة
سالمة يا سلامة .. على مصر التانية أم علامة