في المعتقل ياسلام سلم
موت واتألم
لكن لمين راح تتظلم
والكل كلاب
كلاب حراسة وكلاب صيد
واقفين بالقيد
يكتفوا عنتر وابو زيد
ويهينوا دياب
الكلب فيهم لايميز
ولايتميز
عن الغورريلا و مطيز
وبظفر وناب
ومدربينه يدق الكعب
فوق راس الشعب
يزرع في قلبه الخوف والرعب
من غير اسباب
غير ان شلة حراميه
وشمحطيه
عايشين في مصر عواطلية
وبياكلوا كباب
عايزين يعيشوا عرض وطول
على كده على طول
وان حد بلضم سيدنا يقول
جربه ياكلاب
ع المعتقل يرموه في الضيق
مايلاقي صديق
وادارة شغلتها التلفيق
تكتب له جواب
غير الصحافة ماتهول
بقى وتأول
وبعد ما الكدب يطول
تطلع في كتاب
لكن يامصر
حيجي اليوم
ويطير النوم
وكل ظالم أو مظلوم
حيكون له حساب
---
سجن القلعة 1969
لقد أصابتنى القشعريرة ..قصيدة رهيبة فعلا
ReplyDelete