بهية

يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن الارض سمرا و قمرا
و ضفه و نهر و مراكب
و رفاق مسيرة عسيرة
و صورة حشد و مواكب
ف عيون صبية بهية
عليها الكلمة و المعنى



مصر يا امّة يا بهية
يام طرحة و جلابية
الزمن شاب و انتي شابة
هو رايح و انتي جاية
جاية فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية
يا بهية



الليل جزاير جزاير
يمد البحر يفنيها
و الفجر شعلة ح تعلا
و عمر الموج ما يطويها
و الشط باين مداين
عليها الشمس طوافة
ايدك في ايدنا
ساعدنا
دي مهما الموجة تتعافى
بالعزم ساعة جماعة
و بالأنصاف نخطيها



مصر يا امّة يا سفينة
مهما كان البحر عاتي
فلاحينك ملاحينك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاتب
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية

و يعود كلامنا في سلامنا يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى
تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني

اطلع من دول

اطلع من دول يابن الاباليس
اطلع من دول يابن الهرمه
تلبسوا قفاطين
تلبسوا تلاليس
انت البورمه
غير هلاهليك
يا خواجه
وهدوم دلاديلك
يا خواجه
وان شالله تخش ف تلاجه
يا خواجه الناجه كوا الناجه
حتشيل سمسارك فى شكاره
وحتطلع واكل بالصرمة

السكات

سكات سكات سكات
حواديت ورا السكات
مليان كلام لكنى
اخرس من السكات
سكات سكات سكات
مات الكلام وبات
جدار لالف دار
يبادلوني السكات
سكات
سكات
سكات
لكن لسكاتنا معنى
أنطق من الكلام
وكل من سمعنا
يفهمنا بالتمام
وحق من جمعنا
لينطق الكلام
ويقول الصمت مات
ويصرخ فى السكات
سكات
سكات
سكات

الشركسي

يا شركسي
يا أبو بندقيه
لا دين لا ذمه
لا إنسانيه
كرباج فى إيدك
والناس عبيدك
والفرده حتى
ع الجلابيه

الوف بطيري
ويلوف بغيري
يا شركسي
يا اللى كلت خيري
شافط عرقنا
كاشف ورقنا
والله سرقنا
يا مصراويه
الشركسي أبو بندقية

الصبر طيب
الصبر طيب
وأصبر وصبري دايما يخيب
سنين طويله
فاتت لا حيله
والعمر غيله
ضاع من إديه
يا شركسي أبو بندقية

الأقوال المأسورة

من سفر ما قبل الخروج

المجد للشاه
فى الاعالى
وبالناس المذله
وعلى الارض
الخراب
" شاهبور بختيار "



من سفر الخروج

حبيبك وصاحبك
وصاحب حبيبك
كلام كله فارغ
عديم المعانى
اذا الندل صاحبك
يصاحبك لعلة
وتسمع كلام
زي كذب الاغانى
وانا اللى اشتريت الخسيس
بالخسارة
وبعت الاصيل
اللى يا ما اشترانى
واول ما هبت رياح النهاية
خلعنى الخسيس
من صباعه و رماني
"الشاهنشاه رضا فهلوي"


من سفر ما بعد الخروج

اخويا الامير
بزرميط الايرانى
وعظنى ونصحنى
وسلك ودانى
لان اللى نابه
يا حبه عنيا
ما يتيخلوش أي كاتب اغانى
دا كان لسه قاعد
معايا النهارده
ولابس خواتم دهب امريكانى
صحيح الشعوب
بنت كلب ولئيمة
وممكن
تزيح العروش فى ثوانى
"واحد صاحبنا"ء

أحمد أفندي

أحمد افندى محمد حامد عبد العال
صاحب عيلة كبيرة مراته و ست عيال
عنده اسم الله حسن و حسين وسعيد و نوال
والمقروصة نفيسة و قدم الخير وصال


أحمد افندى مدرس عربى قديم ومتين
شكله تشوفه
تقول على طول من أهل الدين
شايل سبحة خشب البندق
م الغاليين
ساعه تلف يمين
وسواعى تلف شمال


غير السبحة
طالعه زبيبه ف قورته كمان
يعنى دليل
على انه بيسجد للرحمن
هيبه و تقوى
ومظهر ناطق بالايمان
ثم المشيه عليها القيمه
وفيها جلال


احمد افندى
ساكن شقه فى رابع دور
بيت الحاج عويس
ومراته الست بدور
كانوا حبايب قبل ما يتأتى المقدور
ساعة نحس اتقلب البيت
واتبدل الحال


ابن الحاج عويس
كان عامل كوره شراب
والعصريه
نازل يلعب جنب الباب
جاى بيشوط
قام طارت فرده من القبقاب
جت فى زبيبة احمد افندى
و دمها سال


ضحكت عيشه مرات السقا
و قالت يوه
ظاطوا عيال الحارة وقالوا
الجردل اهو
احمد افندى فوت عقله
بقي مش له
رقع الواد قلمين سخنين
كومه فى الحال


صرخت نوسة مرات
محمود عبدالجواد
كبدى يا خويا
يا ناس الراجل قتل الواد
نزل السيد سالم يجرى
وقال يا ولاد
اوعوا الراجل يفلت منكوا
دا موته حلال


احمدافندى زعق من تحت
وقال يا حسين
هات سكينه ونزل اخوك
ومعاك شومتين
نزلوا العيلة
واشتغل الضرب شمال ويمين
والصوت لعلع والنبابيت
غنت موال


خش محمد مرسى يخلص فى الموضوع
خد سكينه ف جنبه
وكان عيان موجوع
وقع ع الارض يئن
وعينه تشر دموع
هي ثوانى وطلعت روحه للمتعال


هاجوا العالم
والنسوان رقعت بالصوت
وامه تقول
ياحبيبى ازاى دهولك الموت
واحمد افندى لم عياله
و على برغوت
طلب النجدة من تليفون عبده البقال


وصل النجدة
لقى حوالين الجثه اتنين
اخته بتلطم
وامه بتتمرغ فى الطين
سأل الظابط
فين امال المتخانقين
قالت نوسة من شباكها
دا أبو وصال


طلعت هجمه
ان شالله ما حد يشوفها يا ناس
رزعوا الباب فشخوه اتنين
طارالترباس
خبط الحله قلبها
وساح منها القلقاس
عاص القله
ولغمص وش البت نوال


احمد افندى
وقف على حيله وقال جرى ايه
انت ازاى تتهجم كده على بيتى يا بيه
لاشه الظابط
جريوا عياله و خافوا عليه
حسن اترمى على ابوه
واتشعلق فيه وصال


امر الظابط للشرطية بالتفتيش
واللى حيعتر فى السكينة حيبقى شاويش
بعد ما لفوا اوضها وداخوا
وقالوا مفيش
لمح الظابط دم مبقع
جنب شوال


زغد المخبر
وقاله ازاى بتقول فتشت
جرى من خوفه اتكعبل
كوّع جنب الطشت
لحقه زميله وقال جرى ايه
مالك طبشت
تيّس قام مش قادر
حتى يرد سؤال


مخبر تانى
عشان موعود يترقى شاويش
فرد المطوة
و هم يمزع بيها الخيش
اول خبطه اتخض
وقال يا خبر
دا حشيش
احمد افندى وقع من طوله
فشر تمثال


كانت نزلة
ان شالله ما حد يشوفها يا هوه
احمد افندى
قفاه من حيل الضرب هاروه
وهوب شالوه
و ف قلب البوكس رموه
و ام عياله تقوله
يا سبع البيت ياغزال


ضحكت عيشه مرات السقا
وقالت يوه
ظاطوا عيال الحارة و قالوا
المجرم اهوه
احمد افندى فوت عقله
ما بقاش له
صار يلطم على وشه يقول
حبسونى عيال

آه يا خي

وآه ياخي آه ياخي
كنا نملا الدنيا ضي
بس اه
لو كنا زي
الف اه
واه يا خي
كنا جبنا الشمس
من برج الاسد
واديناها للعيال
غزل البنات
يطبعوها ع الهدوم
والكراسات
يشبكوها
ورد شعور البنات
ينظموها
عقد من شر الحسد
يضوي نوره
لما يضوي
كل حاره وكل حي
بس اه لو كنا زي
الف اه
واه ياخي
كنا المظلوم اذا هاجم
جري
كنا لو كان السلاح فى يدنا
والمعارضه
يد واحده عندنا
دسنا شاهنا
وامريكانه بنعلنا
وابتدينا الثوره
من اوسع طريق
كان تمنتاشر يناير
ف الشوارع لسه حي
بس اه
لو كنا زي
الف اه
واه ياخي